DILI, STLTIMORLESTE.com – Polísia Nasionál Timor Leste (PNTL) liu husi Diresaun Servisu Investigasaun Kriminál (DSIK) halo operasaun no buska hodi dezmantela tan atividade ilísitu scam call centre iha Aldeia 4 de Setembro, Suku Comoro no iha Aldeia Tetsari, Suku Ulmera, Postu Administrativu Bazartete, Munisípiu Liquiça.
Tuir observasun STL iha terenu, PNTL liu husi DSIK iha Segunda nee (13/07/2026) halao operasaun iha Aldeia 4 de Setembro, Suku Comoro, asegura seidadaun estranjeiru ho nasionalidade Xina nain 14 neebe halao hela atividade scam call centre, inklui mos iha Ulmera Munisipiu Liquiça nain 76, iha detensaun ba sidadaun Indoneziu no Xina hamutuk nain 90.
Diretór Servisu Investigasaun Kriminál, Superintendente, Xefe Polísia João Belo dos Reis hatete, bazeia ba informasaun neebe DSIK rekolha, Autoridade Komunitariu rua nee servisu hamutuk ho DSIK, depois DSIK detekta katak iha duni ilísitu scam call centre iha Ulmera, Munisipiu Liquiça nomos iha Suku Comoro, Munisipiu Dili nian.
“Ohin ita lansa ekipa rua ida iha Area Kampung Baru, Suku Comoro nian nomos iha Ulmera, Munisipiu Liquiça, husi fatin rua nee ita detein sidadaun Xineza 14 iha parte Kampung Baru, sira halo hela sira nia servisu ilísitu scam call centre nian, ida seluk iha parte Ulmera uma kontener boot ida ema hamutuk 76 kompostu husu Sidadaun no Xineza,” hatete Diretór Servisu Investigasaun Kriminál (DSIK), Superintendente Xefe Polísia João Belo dos Reis ba jornalista sira iha Komjer Dili, Segunda (13/07/2026).
Nia esplika, depois halo investigasaun, sira prende hotu sasan sira neebe sira uza ba atividade ilísitu scam call centre hanesan leptop no kareta kda ho motor ida nomos telefone.
“Hau sei publika fila-fali ba media,.agora ita sei halo verifikasaun ba sasan sira neebe ita rekolha husi sira hanesan evidensia husi sira nia aktus neebe sira halo,.depois aban hanesan nee hau sei halo fali konferensia imprensia ba media hodi informa sasan sira neebe ami iha, depois sira husi nasaun neebe,” nia afirma.
(jen)
