DILI, STLTIMORLESTE.com – Embaixada Estadus Unidus Amerika iha Dili no Governu Timor Leste (TL) kolabora iha projetu ACHIEVE TL hodi hametin servisu saude no nutrisaun ba inan, bebe oan no labarik iha Munisipiu Manufahi.
Liu husi karta komunikadu neebe STL simu husi media Embaixador Amerika, Segunda (13/07/2026) hatete, Embaixada nia fungsionariu sira hamutuk ho Ministeriu Saude (MS), no autoridade lokal sira iha loron 7 de Julhu tinan nee halo ona lansamentu treinamentu ba voluntariu saude komunitaria iha suku Holarua, Munisipiu Manufahi. MS no ofisial lokal sira espresa apresiasaun ba apoiu Estadus Unidus Amerika (EUA) nian hodi halo servisu kuidadu saude kritiku sira asesivel liutan ba inan no labarik sira iha area rural sira.
Komunikadu nee haktuir, projetu ACHIEVE TL neebe finansia husi EUA nee fo treinamentu ba voluntariu nain 20 iha sukus 5 hodi identifika preokupasaun saude nian no hadia kuidadu ba inan no labarik nia saude, nutrisaun, moras hadaet no la hadaet sira. Enkuantu MS simultaneamente fo formasaun ba fungsionariu sira iha suku adisional 3, nee hatudu governu nudar nain ba projetu nee no ninia sustentabilidade.
Tuir karta nee katak, EUA servisu hamutuk ho governu TL, lider munisipiu sira, reprejentante komunidade sira, projetu nee hametin servisu saude essesnsial sira, apoia traballador saude sira iha lina oin, no habelar divulgasaun ba komunidade iha Postu Administrativu Same too fulan Setembru. Parte ida husi inisiativa globar ho durasaun tinan 8 neebe implementa iha TL husi Palladium neebe parte ida husi konsorsiu lidera husi paktu, projetu ACHIEVE nee reafirma EUA nia komprimisiu hodi harii TL ida neebe prospero, saudavel no auto sufisiente.
(dom)
