DILI, STLTIMORLESTE.com – Ensinu baziku primeiru siklu too segundu siklu la tuir ezame hanesan ho terseiru siklu no sekundariu sira, tanba iha primeiru siklu no segundu siklu iha kurikulum hatete iha deit avaliasaun kontinua.
Koordenador Eskola Baziku Fillial 1 de Outubro, Fernando Barreto hatete, iha ensinu baziku primeiru siklu too segundu siklu sei la tuir ezame hanesan ho terseiru siklo no sekundariu sira, tanba iha primeiru siklo no segundu siklo iha kurikulum hatete iha deit avaliasaun kontinua.
Nia dehan, avaliasaun kontinua nee signifika, iha materi neebe manorin nain sira hanorin iha neeba iha konteudu ho numeru lisaun balun mak too ona entaun mestri sira halo avaliasaun kontinua ba estudante sira. Ida nee laiha data ida fiksu ba sira, nee depende deit. Porezemplu hanesan iha primeiru ano, mestre fo ohin, ida fali bele aban no ida fali bele bainrua, neebe depende ba nia materia nee too ona para halo avaliasaun.
“Materi mak too ona ida nee, entaun nia diferensia mak iha nee. Neebe situasaun ida neemak sira bolu dehan avalaisaun kontinua, maibe too terseriu periodu sira hahu fali husi terseiru ano too ba sexto ano iha ezame ba segundu periodu nian, maibe ba primeiru no segundu ano sei nafatin ho avaliasaun kontinua. Tanba sira nia prensementu kaderneta la hanesan ho kuatru ano too ba sexto ano,” dehan nia ba STL iha EBF 12 de Outubro Tasi-Tolu, Segunda (13/06/2026).
Nia katak, iha nee materia hotu-hotu lori husi professor da turma, laos lori ketak husi kada professor sira. Iha nee laiha professor disiplina maibe professor da turma mak sei kobre hotu materi 9 iha klase ida, nee hahu husi primeiru ano too sexto ano.
Nia hatete, iha nee laiha problema kona ba professor, tanba profesor bolsa kandidatu ba datoluk hamutuk 16, mai tan ho professor sira iha nee bele dehan sufisiente ona. Maibe total estudante mak sei barak nafatin, maibe lao tuir deit kondisaun iha eskola nee.
Estudante Joaquen da Silva hatete, sira laiha izame ba segundu periodu nian. Izame periodu nee akontese bainhira tama ba izame terseiru periodu nian. Neebe ba primeiru no segundu period nee simu deit avaliasaun husi profesora ba disiplina neebe mak sira fo hotu ona.
Nunee mos aman estudante Rojerio Lemos hatete, labarik sira iha eskola ida nee halo deit avaliasaun ba disiplina neebe mak profesora fo ona. Sira laiha izame segundu periodu nian, halo deit avaliasaun kontinua ba sira nia materi sira. Nudar inan aman nafatin akompana oan sira mai tuir avaliasaun ho diak ba materi hotu neebe sira hetan ona.
(dom)
