DILI, STLTIMORLESTE.com – Dala barak ema hanoin deit ba moris loron ba loron nia, hodi haluha tiha sinal neebe Maromak halo ema.
Lia hirak nee hatoo husi Padre Paul Kerans, SVD ba STL, Tersa nee (14/07/2026) hatete, reflesaun no devosaun ba loron ohin foti husi Evanjellu MATEUS 11:20-24.
“Iha Evanjellu ohin nian, Jesus kondena sidade sira neebe nia milagre barak liu halao tanba sira la arepende an. Jesus espresa tristeza klean no hirus neebe loos tanba sira nia falta arependementu no fiar maske sira haree ona ninia obra kbiit nain sira. Pasajen ida nee hatoo mensajen klean mai ita konaba importansia atu rekonese no hatan ba Maromak nia prezensa no bolun iha ita nia moris,” dehan Padre.
Padre dehan dala barak ema hanoin deit ba moris, okupa demais ba serbisu no ba moris nia hodi haluha milagre Maromak nia neebe halo ema moris no mate sira.
“Iha ita nia mundu ohin loron, dala barak ita kaer metin iha ita nia moris loroloron nia okupadu no rutina. Fasil atu haluha sinal sira Maromak nia serbisu nian iha ita nia sorin no iha ita-nia laran. Ema husi Korazín, Betsaida, no Kafarnaum iha privilejiu neebe boot tebes atu haree rasik Jesus nia milagre sira,” dehan Padre.
Padre dehan maske ema haree ho matan husi milagre Maromak nia halo ema ema matan delek sira haree fali, ema ain kudeik sira lao, ema moras lepra sira sai diak fali, no ema mate sira moris hias fali. Maske nunee, sira nia laran la nakdoko nafatin no sira la konsege arepende aan.
“Leitura nee dezafia ita atu reflete kona ba ita-nia moris rasik. Dala hira maka ita esperiensia Maromak nia bensaun sira, asiste Ninia milagre sira, no maske nunee la muda? Ida-nee maka apelu ida ba introspesaun no transformasaun. Arependimentu laos deit sente laran susar ba ita-nia sala sira nee mak mudansa fuan no neon nian neebe lori ita atu fila husi ita nia sala sira no hakat ba Maromak nia hakarak,” dehan Padre.
Bainhira ema hatan ba Ninia bolun ho arependimentu sinseru, loke fuan ba Ninia grasa, perdaun, no kbiit transformador.
Tanba nee Padre husu ema hotu hotu maske halao serbisu ba moris loron ba loron nia maibe keta haluha konaba isin no klamar nia, no husu nafatin hakbesik aan ba Maromak, maske iha moris hasoru dezafiu oin oin maibe keta lakon esperansa tanba Maromak sempre hamutuk nia ema neebe bolu nia husi orasaun.
(eme)
