DILI, STLTIMORLESTE.com – Embaixadora Xina mai Timor Leste (TL), Wang Wenli hatete, Xina prontu kolabora ho Governu TL atu kombate kazu Scam Call Centre iha TL.
Lia hirak nee hatoo husi Embaixadora Xina mai TL, Wang Wenli ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Tersa nee (14/07/2026).
Embaixadora Xina hatete, Xina prontu koopera ho Governu TL atu kombate kazu Scam Call Centre iha TL.
Embaixador Xina ba TL hatete, ohin mai halo enkontru ho Prezidente Republika koalia mos assuntu ida nee no embaixador hatutan Xina iha pozisaun neebe rigor atu hapara jogu online.
“Sim, ohin hau koalia mos ho Prezidente Republika, Governu Xina nia pozisaun klaru, katak iha pozisaun rigorozu atu hapara jogu online sira nee. No fila fali ba fulan Maiu tinan kotuk, ami hatoo ona ba Governu TL konaba risku potensial jogu online nian,” dehan Embaixadora.
Liga ho kazu nee Embaixadora relata ona ba nasaun sira Sudeste Aziatiku nian konaba impaktu husi jogu online.
Embaixadora Xina mai Timor Leste louva ho funsionamentu efisiente no lais husi Governu TL no departamentu polísia ho autoridade seguransa sira husi instituisaun oin oin neebe servisu makaas halo ona buska ba kazu jogu online Scam Call Centre barak iha TL.
“Ami louva operasaun efisiente no lais husi Governu TL no departamentu polisia. Ami elojia operasaun neebe lalais no efisiente. No Governu Xines halao ona kooperasaun hodi kontra fraude ho nasaun sira Azia nian, inklui TL. Ami fornese ona informasaun konaba kriminozu sira nee ba departamentu polisia,” dehan Embaixadora.
Nia hatutan tan katak, Xina reafirma katak Governu Xina proteje mak direitu no interese sira husi sidadaun Xina nian neebe mak obedese ba lei iha Timor Leste. Nunee, konaba asuntu deportasaun sidadaun Xineza sira neebe involve aan iha kazu Scam Call Centre nee presiza iha kooperasaun entre Governu TL ho Governu Xina no tuir aplikasaun lei husi nasaun rua nee nian.
Aleinde nee Embaixadora ho Prezidente Republika mos diskute konaba koperasaun Timor Leste nia neebe lao daudaun ona.
“Dezde 2019, Xina estabelese bolsu estudu hodi fo oportunidade ba estudante sira iha UNTL. No dezde 2023 sei fornese oportunidade ida nee ba estudante sira husi IOP, esensialmente buat hotu neebe ami fornese ona fornese liu oportunidade 600, ba mai ikus liu ba estudante sira. No iha tinan ida nee, ami sei fornese tan oportunidade hamutuk 136,” katak nia.
Ba kooperasaun edukasaun foun ida nee, Xina iha vontade atu fornese fundu espesial ba prezidente nian hodi apoiu estudante Timor oan sira, nunee Prezidene atu fornese material ajuda ba sidadaun Timor oan sira hela iha munisipiu sira.
(eme)
