DILI, STLTIMORLESTE.com – Prezidente Autoridade Munisipiu (PAM) Dili, Francisco dos Santos hatete, povu neebe hetan eviksaun iha Dili atu kontribui ba dezenvolvimentu infraestrutura Aeroportu Internasional Prezidente Nicolau Lobato.
Hau nia mensajen mak nee, husu ba hau nia inan aman sira hotu katak, kualker governu ida mak sae mai atu ukun la iha interese atu estraga ninia povu ida nee, sempre iha hanoin ida deit mak atu kore ninia povu husi kiak no mukit nomos hadia ita nia estadu no rai ida nee, husu atu kontribui ba dezenvolvimentu, labele rona fali terseira parte para estraga ita boot sira nia mental, hanesan daudaun nee ita nia maun alin sira mai koalia influensia ita boot sira maibe too ikus estadu sobu nafatin ita boot sira nia hela fatin, tanba nee husu atu kontribui hodi estadu ida nee bem organizadu nunee hatudu ba mundu katak Timor Leste la aat liu ida uluk maibe oituan-oituan hahu iha mudansa ona,” dehan Prezidente Autoridade Munisipiu Dili, Francisco dos Santos ba jornalista sira iha Marinir Areador Aeroportu Internasional Prezidente Nicolau Lobato, Dili, Tersa (14/07/2026).
Iha okaziaun nee, komunidade abitantes hetan eviksaun iha Aldeia Marinir Beto Timur, Juliao Guterres dehan, nuudar sidadaun ida sempre koopera ho governu ba dezenvolvimentu, maibe indemnizasaun ba rai nee tenke iha no selu hotu, labele komunidade balun mak hetan indemnizasaun maibe komunidade balun la hetan, ida nee mak ladun diak.
“Koopera, ami povu koopera ho estadu, maibe atu selu indemnizasaun nee tenke selu hotu, laos komunidade balun deit mak hetan, ami komunidade balun la hetan fali, ida nee mak halo ami ladun satisfas ba ida nee,” dehan Juliao.
Iha biban nee nia husu ba governu atu muda povu sai husi ninia hela fatin tenke ho dignu hanesan komunidade balun iha Beto Timur neeba, governu fo indemnizasaun mak sira hamamuk sira nia hela fatin.
“Ami nia maluk sira iha sorin neeba hetan indemnizasaun, sira simu kedan pagamentu ba rai, uma no plantasaun mak foin hamamuk sira nia fatin, maibe iha area marinir weste nee mak la hetan pagamentu, ida nee mak halo ami triste, tanba governu selu deit rai ho plantasaun maibe rai mak la iha fali,” afirma nia.
Xefe Suku Madohi, Bernardino de Cristo Ferreira dehan, durante nee esforsu husi Redi ba Rai no Teras Propriedade, ohin governu mai halo eviksaun hanesan nee sira sei la koalia buat ruma ona maibe tanba seidauk iha garantidu ba povu mak too ohin loron povu nafatin duvida no trauma, tanba saida maka sira nia preokupasaun nee governu seidauk responde.
“Hau mai koalia beibeik ona ho hau nia komunidade sira katak, maske seidauk simu indemnizasaun maibe imi tenke kontribui, tanba nee ohin hau husu bá advogadu sira ho Redi bá Rai atu mantein pozisaun maibe hakarak ou lae tenke simu dezenvolvimentu iha ita nia rai,” dehan nia.
Iha biban nee nia dehan, povu sempre koopera ho estadu ba dezenvolvimentu, maibe daudaun iha Aldeia Marinir nee komunidade sira hetan ona indemnizasaun ba uma no plantasaun, maibe rai husi Teras Propriedade seidauk iha informasaun ba sira, tanba nee sira nafatin preokupa, tanba balun hetan ona indemnizasaun no balun seidauk.
(jos)
