DILI, STLTIMORLESTE.com – Atu evita para labele iha falsifikasaun diploma, entrega baze dadus anunsiu rezultadu kada tinan nee ba munisipiu ho diresaun nasional eskolaridade sira.
Haktuir husi Koordenador Gabinete Unidade Kurrikulu Nasional iha ME, João Mau Pelu ba STL iha ME, Sesta nee (17/07/2026).
“Konaba diploma atu verifika diploma, ema sira neebe mak legaliza diploma, atribuisaun diploma, atu evita para labele iha falsifikasaun diploma, ita entrega baze dadus anunsiu rezultadu kada tinan nee ba munisipiu, ho diresaun nasional eskolaridade sira, atu nunee bainhira sira atu legaliza diploma nee, sira haree no konfirma mos baze de dadus husi currikulu ba estudantes sira neebe remata ona ensinu baziku, sekundariu jeral no tekniku vokasional,” nia informa.
Nia dehan, konaba asuntu ida nee sira nafatin halo koordenasaun ho parte diresaun ensinu sekundariu no ensinu baziku sira iha Ministériu, atu nunee bele fo informasaun ba malu, liga ba asuntu neebe ohin mensiona.
Iha sorin seluk, Diretor Nasional Ensinu Sekundariu iha ME, Benjamin Gomes da Cruz Fernandes hatete, Ministeriu Edukasaun (ME) nafatin halo kontrolu ba diploma falsu, bainhira sidadaun neebe legaliza sira nian diploma, parte ME sei identifika didiak diploma nee falsu ou lae.
“Ami kontrola nafatin konaba diploma falsu nian nee ami entrega ona diploma falsu 31 ba Inspesaun jeral no agora husi Inspesaun jeral mak halo prosesu ba ida nee, sira mak halo ida nee, ami labele interven, tanba ami nian mak nee, bainhira iha legaliza mak ami hetan, nee ami entrega ba sira, husu ba ita boot sira se bele ba husu iha parte inspesaun nian katak, ninia prosesu nee lao too iha neebe ona,” nia akresenta.
Nia dehan, sira kontrolu nafatin, karik bainhira hetan diploma falsu nee sira sempre prende, nomos sira sempre entrega ba parte inspeksaun jeral atu buka tuir ema neebe mak falsifika dokumentus, tanba nee bainhira sira hetan diploma falsu, nee sira sempre hatoo ba parte relevantes sira.
(jac)
