DILI, STLTIMORLESTE.com – Ekipa Prezidensia Republika (PR) liu husi Kantina Matak Prezidente Republika nomos Unidade Empoderamentu Feto halo kolaborasaun ho doutor sira husi Channels Internasional Singapura, hodi halo tratamentu nehan gratuita ba labarik sira.
Iha biban nee Jestor Dapur Prezidente Republika, Bela Galhos ba jornalista sira iha Palasiu Prezidensial Nicolau Lobato, Bairo Pite, Sesta (17/07/2026) hatete, ohin ekipa mediku husi Channels Internasional Singapura mai halo tratamentu nehan ba labarik sira iha Palasiu Prezidensial tanba hetan kolaborasaun husi ekipa Prezidensia Republika liu husi Kantina Matak ou dapur Prezidente Republika nomos Unidade Empoderamentu Feto.
“Programa ohin nia liga ba dental ida nee hola parte iha serbisu kantina matak Palasiu Prezidente nia hamutuk ho unidade empoderamentu feto, ami hetan oportunidade husi rai liur sira hakarak halo sira nia kontrubuisaun ajuda programa empoderamentu feto nomos kantina matak sira oferese Chek cup nehan neebe gratuita, ita hotu hatene katak laos ita nia povu hotu hotu asesu ba oportunidade sira hanesan nee entau ita agradese tebes liu husi palasiu Prezidente husi programa Prezidente nia ami sira neebe mak toma responsablidade iha unidade rua nee halo koperasaun ho sira neebe ohin mai sira halo chek up ba oan sira nomos inan sira neebe akompanha oan sira ohin marka prezensa hodi hetan tratamentu nehan gratuita tanba povu sira nee mai husi familia kiak familia kbiit laek,” dehan Jestor Kantina Matak.
Nia dehan, tratamentu nehan nee hanesan asaun milagre ida tanba dala barak laos ema hotu halo ida nee, no atu halo tratamentu presiza osan maibe agradese ba mediku sira husi Singapura mai halo tratamentu gratuita.
Sira tarjetu duni Timor tanba halo kolaborasaun ho Prezidensial Republika liu husi unidade empoderamentu ba feto nomos kantina Matak dapur palasiu Prezidensial ba povu kbiit laek nia.
Nia hatutan, ohin halo tratamentu iha palasiu Prezidensial depois sira sei halo fali tratamentu bai ha fatin seluk.
Nunee mos Doutor Professor Shing Chuan Hooi husi care Channels Internasional Singapura hatutan ohin ekipa mediku husi Singapura mai halo tratamentu nehan ba labarik sira Palasiu tanba hetan koperasaun ho ekipa Prezidensia Republika.
“Ami mai husi Channels internasional Singapura, programa neebe halao iha palasiu nee programa kontinuasaun neebe mak durante nee ami halao 20 anos ona iha Timor Leste ohin ami fokus liu ba tratamentu nehan ba labarik kiik sira nomos Check Up jeral, karik ami identifika moras ruma husi kiik oan sira neebe mai Check Up ami sei hatoo fali mai Palasiu Prezidensial liu husi Mana Bella Galhos hodi haree tok saida mak ita bele halo atu bele atua ou fo tratamentu ruma neebe presiza,” dehan nia.
Nia hatete, kooperasaun ida nee akontese iha Palasiu Prezidensial liu husi Kantina Matak Palasiu Prezidensial dapur ba povu nomos Unidade empoderamentu feto neebe mak kontinua desde kedas inisiu 2022, hahu serbisu hamutuk ho NGO nasional no internasional ho ekipa neebe hakarak ajuda programa Prezidente Republika Jose Ramos Horta nia.
Tratamentu nehan ba labarik ho gratuita nee laos premeiru vez, maibe ida nee ba dala tolu ona husi Channels internasional Singapura dala rua no husi estudante UNTL dala ida.
(eme)
