DÍLI, STLTIMORLESTE.com – Antigu Deputadu husi Bankada Partidu Sosial Demokrata (PSD), Leandro Isaac fo sai preokupasaun konaba influensia ideolojia kontra fiar no afirma katak Maromak mak matadalan moris nian. Nia hatoo katak moris laiha fiar relijiozu tanba deit influensia ideolojia sei lakon ninia valor lo-loos.
Tuir Leandro Isaac, maski ideolojia sira bele fo diresaun ba politika ka sosial, maibe buat sira nee labele troka kbiit moral no klmar nian neebe mai husi fiar spiritual. Nia deklara katak fiar ba Maromak nuudar pilar fundamental neebe labele troka ho deit hanoin umanu nian.
“Ideolojia bele fo matadalan sosial, maibe labele fo kbiit moral neebe mai husi fiar ba Maromak. Bainhira esklui tiha Maromak husi moris, ema sei lakon sentidu lo-loos husi vida nee nian,” dehan Antigu Deputadu nee ba STL iha nia rezidensia Díli, Sesta nee (17/07/2026).
Iha ninia komentariu Antigu Deputadu PSD nee hatoo apelu ba jerasaun foun sira atu analiza didiak ideolojia hotu neebe tama, nunee labele monu ba lasu neebe halo dook husi Maromak, tanba Maromak mak nafatin matadalan moris nian neebe lo-loos ba mundu no aban bainrua.
Iha parte ketak Observador Politika, Mariano da Silva, konsideira preokupasaun Leandro Isaac nian nuudar reflesaun ba mundansa sosial neebe akontese dadaun iha Timor Leste, liu-liu impaktu husi globalizasaun no modernizmu ba hanoin jerasaun foun sira nian.
Tuir nia, analiza nee hatudu katak diskursu politika iha rai laran laos deit koalia konaba dezenvolvimentu finanseiru ka infraestrutura, maibe tenke haree ba oinsa atu salvaguarda valor kultura no fiar tradisional sira neebe sai ona nuudar identidade nasional.
Entretantu Akademista UNTL, Daniel Vieira hatoo katak diskursu konaba fiar no ideolojia presiza duni dudu ba debate akademiku neebe klean.
Nia esklarese katak, kritika neebe mosu hatudu nesesidade ba instituisaun edukasaun sira atu hametin konhesimentu no integridade moral estudante sira nian, nunee jerasaun foun sira labele lakon sira nia baze fiar nian wainhira simu influensia no teoria foun sira husi liur.
(car)
