DILI, STLTIMORLESTE.com – Jesus hanorin ema atu moris simples, haraik aan no onestu, ida nee folin boot iha Maromak nia oin, duke ema neebe moris ho riku maibe laiha dame.
Lia hirak nee hatoo husi Padre Rickardo Pasang, SVD ba STL, Sesta (17/07/2026) hatete, reflekasaun ba loron ohin hanorin ema oinsa moris ho simples maibe nakonu ho domini ha familia no sosiedade nia leet, moris ho haraik aan nee folin boot tebes.
“Meditasaun ida nee hanorin ita atu moris ho simples, haraik aan, no onestu. La presiza liafuan barak, maibe espresa domin lolos ba ema barak. Maromak lakohi ita atu sai ema boot, maibe atu sai laran moos iha Nia oin,” dehan Padre Richardo.
Padre dehan, dala ruma moris sente hanesan ema Israel sira esperiensia iha livru Isaías. Estrada nee taka ona, maibe fuan sira sei todan nafatin. Iha susar nia leet, iha kalan naruk nia leet, mosu saudade klean ida, “Ho hau nia klamar tomak hau hakarak tebes Ita, Nai,” Iha neeba duni maka ita aprende atu buka Nia. No Maromak la nonook deit. Nia promete atu fo dame. Nia bele hamoris fali esperansa husi fatin neebe sente mate,” dehan Padre.
Padre dehan, bainhira ema lao sala dalan halo refleksaun ba aan hodi husu perdaun ba Jesus ba nia sala, hodi buka Jesus iha neeba Jesus sei fo dame no hanorin oinsa bele hetan fali esperansa iha moris sai ema neebe obiedese ba Jesus no moris ho haraik aan.
“Promesa nee kumpri ho perfeitu husi Jesus. Iha mundu nia leet neebe ezije atu ita sai forte, kapasidade, perfeitu, Jesus bolu ho lian neneik “Mai besik hau imi hotu neebe kole no todan, no hau sei fo kmaan ba imi”. Nia la husu ita atu hamoos ita nia moris molok mai. Nia konvida ita atu mai hanesan ita, ho matanbeen, ho kanek, ho kole,” katak Padre.
Jesus mos konvida ema atu muda hahalok arogansia loko aan sira ba haraik aan no moris obedese ba Jesus nia hanorin no hadomi malu iha familia no sosiedade nia leet.
“Jesus mos konvida ita atu aprende husi Ninia laran maus no haraikan. Ninia jugu laos atu hanehan, maibe atu Nia orienta ita atu lao hamutuk. Todan nee la lakon kedas, maibe Nia lori hamutuk ho ita,” katak Padre.
Bibi atan kreda Katolika nee dehan meditasaun ida nee hanorin ema atu moris ho simples, haraik aan, no onestu, espresa domin lolos ba ema barak. Maromak lakohi ema atu sai ema boot, maibe atu sai laran moos iha Nia oin.
“Ohin, mai ita lori ita nia todan hotu ba Jesus. Laran susar tanba lakon, ansiedade konaba futuru, fadiga tanba responsabilidade. Tau buat hotu iha Nia ain. Tanba iha Nia deit mak ita nia klamar bele hetan deskansa lolos,” katak Padre.
Jesus mos konvida ema neebe sente todan no kolen besik ba nia, Ema bainhira hasoru dezafiu iha moris buka Jesus sei hetan solusaun, tanba Jesus mak dalan moris no dalan salvasaun rohan laek nia.
(eme)
