DILI, STLTIMORLESTE.com – Dili Institute Of Technology (DIT) ho Universidade Gadjah Mada (UGM) Indonezia, halao seminar Internasional ho tema “Hametin Kolaborasaun Transfronteirisu iha Edukasaun, Peskiza no Envolvimentu Komunidade entre Repúblika Indonézia no Repúblika Demokrátika Timor Leste” neebe organiza husi Klibur Alumni Universiade Gadjah Mada (KAGAMA) Timor Leste, haree liu ba peskiza hamutuk area pontensial iha fronteira rai rua, konkretiza liu husi Estajiu Serbisu Komunitariu ou Kuliah Kerja Nyata (KKN) Internasional Tematik DIT-UGM.
Seminar internasional neebe halao iha Auditorium DIT, Xanana Building, Aimeti-Laran, Dili, Sesta (17/7/2026), abertura husi Visi Primeiru Ministru, Ministru Koordenador Asuntu Sosial, Ministru Dezenvolimentu Komunitaria no Organizasaun Urbana, Mariano Assanami Sabino.
Seminar internasional nee aprezenta orador nain lima (5) husi UGM kompostu husi Prof. Dr. Ir. Widyanto Dwi Nugroho, S.Hut., M.Agr.Sc., Prof. Siti Helmyati, DCN., M.Kes, Dr. Hilda Ismail, M.Si., Apt, Dr. Leonard Chrysostomos Epafras no Prof. Junun Sartohadi.
Aleinde nee, delegasaun UGM hamutuk ema nain 38, partisipa mos alumni UGM neebe haknaar-aan iha universidade estadu no privadu iha Timor Leste nomos reprezentante husi Munisipiu Belu, Dr. Severinus Mau (Responsavel area peskiza no dezenvolvimentu).
Seminar ida-ne’e sai hanesan oportunidade importante atu hametin academic partnership entre Dili Institute of Technology (DIT), Timor-Leste, no Universitas Gadjah Mada (UGM), Indonesia. Kolaborasaun ida-ne’e sei promove knowledge sharing, joint research, innovation, no community engagement, hodi hasa’e kualidade edukasaun, dezenvolve kapasidade rekursus umanu, no kontribui ba dezenvolvimentu sustentável iha Timor-Leste no Indonesia.
Hamutuk, DIT no UGM komitidu atu harii relasaun akademika ne’ebé forte no sustentável, habelar oportunidade ba estudante, dosente no investigador sira atu aprende malu, halo peskiza hamutuk, no fó kontribuisaun real ba komunidade no dezenvolvimentu nasaun rua.
Vise PM, Mariano Assanami Sabino hafoin abertura seminar internasional nee katak, seminariu ida nee serbisu hamutuk KAGAMA, DIT ho UGM, haree liu ba atu reforsa peskiza teknolojia hamutuk no halo pratika serbisu komunitariu (KKN) hamutuk entre estudante DIT ho UGM nian, neebe fasilita husi Prezidente KAGAMA iha Timor Leste, Prof. Dr. Manuel Florencio Canossa Vong.
“Ita hein katak, programa nee, sei fo benefisiu ba DIT-UGM. Iha workshop ho tema Cross Border Patnership, hau koalia kona ba oinsa hametin relasaun familia iha fronteira ho hakmatek, halai liu ba rekonsiliasaun, haree malu hanesan maun alin, atu hakmatek iha fronteira TL-Indonezia, liu-liu Atambua (Munisipiu Belu) ho Bobonaro, Suai (Kova Lima) no Rejiaun Administrativa Espesial Oecusse-Ambeno (RAEOA) ho Kefamenanu, Soe no Kupang. Ita mesak ida deit, hamutuk iha ilha ida deit ho karakteristiku, kultura, hatais no hahalok balun neebe ita hanesan, maibe ho ida-idak nia bandeira,” dehan nia.
Tamba nee, relasaun amizade neebe diak entre nasaun rua, jerasaun foun sira tenke hatene katak, estabilidade neebe diak iha fronteira nee tenke nafatin ba oin no estabilidade iha fronteira tenke fo fali impaktu ekonomiku ida neebe diak.
Vise PM Mariano Assanami mos dehan, Timor Leste uza osan dollar no Indoneza uza Rupiah, ida nee sei fo impaktu pozitivu ba ekonomia nasaun rua liu husi peskiza sientifiku.
Iha biban nee, Mariano Assanami Sabino husu ba estudante DIT no UGM neebe halao KKN tematik internasional atu haree malu hanesan maun alin no husu ba alumni KAGAMA atu haree ho diak estudante sira neebe mai halo Estajiu Serbisu Komunitariu iha Timor Leste no Indonezia, atu nunee sira fila lori mensajen ho istoria diak.
“Sira mai reprezenta sira nia nasaun, ita mos reprezenta ita nia nasaun, tanba nee simboliza serbisu hamutuk nee, tenke hatudu ita sosiedade neebe ke sibilizadu,” dehan Vise PM Mariano Asanami Sabino.
Iha biban nee, Xefe Delegasaun UGM, Prof. Dr. Ir. Widyanto Dwi Nugroho, S.Hut., M.Agr.Sc, hateten UGM hanesan universidade lider iha Indonezia, UGM kontinua hametin ninia papél liuhosi habelar ninia rede kolaborasaun internasionál sira.
Nia dehan, iha fulan Marsu 2026, Reitor UGM, Prof. Dra. Ova Emilia, M.Med.Ed., Sp.OG (K), Ph.D., mai Timor Leste hodi hasoru malu ho alumni UGM iha iha Timor Leste. Iha oortunidade ida nee, Reitór UGM subliña importánsia atu harii relasaun metin ho komunidade antigu alunu sira iha rai-liur, enkuantu mós promove UGM nia reputasaun iha nível mundiál.
“Enkontru ida nee fó oportunidade ba UGM atu harii ligasaun ne’ebé besik liután ho komunidade alumni sira iha Timor Leste. Iha diskusaun ho alumni sira mós esplora kolaborasaun potensiál oioin entre UGM no instituisaun sira iha Timor Leste.
Área balun ne’ebé diskute inklui peskiza, edukasaun, no esplora implementasaun Programa Internasionál Servisu Komunitáriu (KKN-PPM).
Nia dehan, implementasaun programa internasionál KKN iha Timor Leste sei fó esperiénsia ida neebé estraordináriu ba estudante sira. Aleinde aprende iha kontestu globál, estudante sira mós hein atu kontribui diretamente, hamutuk ho kolega sira hosi universidade lokál sira, iha esforsu sira empoderamentu komunidade nian.
Nia haktuir tan katak Programa Servisu Komunitáriu (KKN) hanesan espasu aprendizajen no plataforma ida ba estudante sira atu fó kontribuisaun loloos ba komunidade.
Nunee mos, Dr. Severinus Mau neebe reprezenta Administrador Munisipiu Belu, Willybrodus Lay hatete, odamatan Munisipiu Belu nakloke ba estudante DIT ho UGM atu halao programa Servisu Komunitariu iha Munisipiu Belu, liu-liu iha area fronteira nasaun rua nian.
“Lori naran Autoridade sira Munisipiu Belu nian, hau hato’o apresia ba KAGAMA Timor Leste neebe organiza eventu akademik ida nee. Odamatan Munisipiu Belu nakloke ba programa ida nee. Fila husi Dili hau sei hato’o ba Administrador Munisipiu Belu, Willybrodus Lay,” katak alumni UGM Yogyakarta nee.
Hafoin serimonia abertura, kontinua ho aprezentasaun husi orador nain lima husi UGM ho ida-idak nia area. Hotu tiha kontinua ho diskusaun entre estudante DIT ho UGM.
(mik/jos)
