DILI, STLTIMORLESTE.com – Manorin sira husi eskola ida-idak hahu halao koreksaun ba pontus ezame segundu periodu husi estudantes sira, nunee bele priense valor ba kaderneta eskolar.
Superintendente Edukasaun Munisípiu Dili, Cesarina C. Guterres ba STL iha nia knaar fatin, Tersa nee (21/07/2026) dehan, monitoring neebe mak halao husi ita nian inspetor sira ba iha ezame segundu periodu iha semana kotuk nee lao ho diak, nee bazeia ba rezultadu monitoring neebe mak sira simu.
“Monitoring neebe mak halao husi ita nian inspetor eskolar sira nee, ezame lao diak hotu no agora daudaun ita nian manorin sira halo koreksaun ba ita nian pontus ezame neebe halao tiha ona iha semana kotuk, ho nunee bele priense ba iha estudantes sira nian kaderneta eskolar, iha semana ida nee nia laran bele priense hotu ona,” nia informa.
Nia hatutan, manorin husi eskola ida-idak bele hahu halo koreksaun, depois halo koreksaun mak bele priense ona estudantes sira nian valor ba iha kaderneta eskolar, valor diak ou lae, nee depende husi esforsu estudantes ida-idak nian, tanba ezame nee remata tiha ona iha semana kotuk, buat hotu lao ho diak.
“Iha ezame semana kotuk nee, ita nian inspetor sira halo monitoring ba eskola sira iha kapital Dili, hodi haree fasilidade no kondisaun, ezame nee lao diak too remata, estudantes ida-idak partisipa iha ezame, tantu husi ensinu baziku no sekundariu sira partisipa iha ezame tuir orariu ezame neebe iha,” nia dehan.
Nia akresenta, koreksaun ba pontus ezame nee halao husi manorin eskola idak-idak nian, bainhira hotu entrega ba eskola, hodi nunee bele priense iha kaderneta, durante nee inspektor sira halo monitoring ba eskola sira, liu-liu monitoring ba atividades ensinu aprendizajen, fasilidade, merenda eskolar, nomos monitoring ba atividades seluk neebe mak lao iha eskola sira.
(jac)
