DILI, STLTIMORLESTE.com – Investe oan sira ba edukasaun importante liu, tanba futuru nasaun iha sira nia liman nunee mos ba familia no komunidade.
Akademista husi UNTL, Dosente Maria Jose da Costa hatete, diak liu inan aman sira investe oan sira ba eskola hodi prepara no hadia sira nia moris iha futuru mai. Tanba atu muda ema nia hanoin no moris iha futuru nee mak husi edukasaun. Neebe inan aman labele sente todan atu hasai osan ba oan sira nian eskola.
Nia katak, maske kondisaun moris bele susar maibe labele lakon esperansa hodi fo oan sira ba eskola. Tanba atu hadia sira nia moris iha futuru, inan aman tenke investe oan sira ba iha edukasaun. Labele toman osan atu halo ba buat seluk iha, maibe osan atu fo oan ba eskola laiha.
“Inan aman sira tenke muda hanoin ka pensamentu katak, osan atu halo buat seluk hanesan ba lia ka kultura nian nee osan iha, maibe ba oan sira nia eskola osan laiha. Neebe diak liu muda hanoin ida nee hodi tau prioridade liu ba oan sira nia eskola. Lisan no kultura nee mos importante, maibe prioridade liu ba oan sira nia edukasaun,” dehan nia ba STL iha Delta, Tersa (21/07/2026).
Diretor Eskola Nicolao Lobato, Rui Lopes dehan, investe oan sira ba edukasaun nee importante liu duke gasta osan barak liu ba lisan ka kultura. Realidade neebe iha gasta osan ba oan nia eskola halo inan aman balun suspira hodi koalia oioin dehan osan laiha maibe gasta ba lia sira la hanoin no suspira oioin.
Nia katak, sira la hatene katak, ho sira nia pensamentu nee aban bainrua sira hateke ba ema seluk nia oan matenek, no sira nia oan la hatene buat ida. Buat sira nee hotu bele halo labarik sira hirus no la gosta inan aman sira.
“Inan aman labele ignora oan sira husi eskola, tenke esforsu hodi fo oan sira asesu ba edukasaun, tanba sira mak fini futuru nasaun nian nomos ba familia. Labele suspira bainhira hasai osan ba oan sira nia eskola, tanba inan aman balun atu hasai osan ba oan sira nian eskola sei hanoin barak maibe ba kultura nian sira prontu hela deit. Neebe diak liu mak hamenus gastu osan ba lisan nian no fo importansia liu ba oan sira nia eskola,” dehan nia.
Entretantu Edukador Fernando Barreto hatete, husu ba inan aman sira tau importante liu ba oan sira nian edukasaun duke ba buat seluk. Tanba so liu husi edukasaun deit mak bele muda ema nia hanoin no hadia ema nia moris iha futuru mai.
(dom)
