DILI, STLTIMORLESTE.com — Primeiru Ministru (PM), Kay Rala Xanana Gusmão husu ba empreza kontratora atu kontinua prosesu konstrusaun edifisiu foun Institutu Nasional Linguistika – Universidade Nasional Timor Lorosae (INL-UNTL), neebe atrazu dezde tinan 2024.
Informasaun nee hatoo husi PM, Kay Rala Xanana Gusmão, bainhira hamutuk ho Diretor Ezekutivu Agensia Dezenvolvimentu Nasional (ADN), Januario Maia Guterres, halo observasaun direta ba fatin konstrusaun, iha Avenida Cidade de Lisboa, Dili, Tersa (21/07/2026).
“Hau husu ba UNTL atu prolonga tan kontratu ba projetu ida nee atu kontinua no labele husik paradu. Husu ba ADN atu akompanha prosesu kontinuidade projetu nee,” PM Xanana husu bainhira tun direta iha terenu obserba Obra INL no UNTL.
Xefe Governu dehan, projetu nee hetan atrazu tanba empreza kontratora enfrenta problema interna, maibe haree realidade iha terrenu, kompanhia esforsu nafatin atu finaliza servisu no kompanhia servisu ho kualidade neebe diak.
Iha biban nee, Diretor Ezekutivu ADN, Januario Maia Guterres hateten, vizita nee bazeia ba rezultadu verifikasaun ADN iha terrenu, tanba nee ohin PM Xanana deside tun direta iha terenu hodi haree situasaun no fo orientasaun ba empreza atu kontinua obra.
“Ohin vizita mai iha UNTL, bazeia ba atualizasaun ADN kona-ba prosesu verifikasaun projetu neebe lao tarde, nunee PM ohin tun direta hodi observa no husu empreza atu kontinua projetu nee,” dehan Diretor Ezekutivu ADN, Januario Maia Guterres.
Nia dehan, Projetu konstrusaun edifisiu foun INL-UNTL ho numeru kontratu RDTL 08/CUNTL/CONCURSO/XII/2023, ho montante osan ba kontratu nee hamutukUS$ 768,574.94.
Projetu konstrusaun edifisiu nee hahu iha loron 5 Janeiru 2024, no tuir planu projetu nee tenke remata iha loron 8 Outubru 2024 no empreza kontratora mak Konsorsiu DWIPONGGO, Bee Feto Kaduak no TATA JV.
(jos)
