DILI, STLTIMORLESTE.com – Tribunal Judisial Primeira Instansia Dili (TJPID) iha loron Tersa nee (21/07/2026) liu husi despaisu ikus ba kazu Jogu Online Scamming Call Centre iha City 8, deside aplika medida haat (4) ba arguidu nain 32 neebe autoridade seguransa detein.
Arguidu sira submete mai iha Tribunal hamutuk 32 no husi Ministeriu Publiku neebe reprezenta husi Prokurador, João Marques, promove sira ho krime Jogu Ilisitu previstu iha artigu 322, Asosiasaun Kriminoza previstu iha artigu 188, Brankamentus Kapitais previstu iha artigu 313 no Burla Informatika previstu iha artigu 268 husi Kodigu Penal Timor Leste nian.
Rona tiha arguidu sira, iha despaisu Tribunal deside aplika medida 4 ba arguidu nain 32, medida haat nee mak hanesan mantein ho mdida Termo Indentidade Rezidensia (TIR), Medida Proibisaun ba Auzensia, Medida Aprezentasaun Periodika semana ida dala ida no medida prestasaun kausaun US$ 2000 kada arguidu. No kausaun neebe iha, hanesan garantia ida ba Tribunal atu arguidu sira labele halai ses husi Timor, se sira halai ses mak osan nee sei afavor ba Estadu.
Antes nee, iha alegasaun Ministeriu Publiku husu Tribunal atu aplika medida kausaun kada arguidu US$ 10.000.
Enkuantu husi parte defeza nian husu Tribunal atu aplika medida Aprezentasaun Periodika ba arguidu nain 32.
Prosesu nee prezide husi Juiz nain ida, Ministeriu Publiku reprezenta husi Prokurador João Marques no Rafael, arguidu sira hetan asistensia legal husi Advogadu Privadu.
Rekorda katak, antes nee autoridade seguransa detein arguidu nain 32, iha area City 8, Suku Manleuana, tanba dekonfia pratika jogu online.
(ter)
