DILI, STLTIMORLESTE.com – Liu husi komunikadu imprensia neebe STL asesu husi Media F-FDTL katak, FALINTIL Forsa Defeza Timor Leste(F-FDTL) liu husi Seksaun Jeneru F-FDTL neebe daudaun nee lidera husi Kapitaun Marquita da Cunha hamutuk ho parseiru Internasionál sira hanesan UN WOMEN, CANADA, FOR ALL WOMEN AND GIRLD realiza Workshop konaba Artifisiál Intelijensia (AI), hodi hasae konhesimentu ba pesoal defeza nian konaba aproveitamentu AI, hodi Avansa Feto, Pás no Seguransa iha Civil-Militár nia resposta ba Dezastre Naturais no Manutensaun Pás.
Xefe Estadu Maior FALINTIL-Forsa Defeza Timor Leste (F-FDTL), Brigadeiro Jenerál José da Costa Soares “Trix” dehan, workshop nee foku liu ba hadia kapasidade institusionál atu responde ba dezafiu seguransa foun hanesan seguransa dijitál, no hasae konhesimentu konaba importansia husi AI no mos nee sai plataforma ida ba dialogu, troka esperiensia no kolaborasaun atu promove pás no seguransa neebe sustentavel.
Nia esplika, kolokio ida nee hetan apoiu husi UN Women nia projetu, “Asegura Pas no Seguransa iha Sivil Militár nia resposta ba Dezastre no Manutensaun” Paz neebe hetan apoiu finansia husi Programa Formasaun no Kooperasaun Militár (MTCP).
Nia deklara, Komando F-FDTL iha privilėjiu hodi subliña katak, integrasaun feto iha F-FDTL nia fileiras laos deit kestaun justisa no ekuidade, maibe liu-liu kondisaun efikásia operasional.
“Iha sesaun abertura ida nee atu repete, hodi F-FDTL nia naran, ami nia apresiasaun klean ba UN Women ba lideransa teknika no konseitual neebe oferese iha prosesu ida nee nia laran, no ba Governu Kanadá nian, liu husi Adidu Defeza iha Jakarta, neebe nia kompromisu pesoal no institusionál sai hanesan parseria desizivu iha parseria trilateral ida nee entre Timor-Leste, Kanada no UN Women – tradus ba rezultadu konkretu no dura ba ita-nia instituisaun,” hatete Xefe Estadu Maior FALINTIL-Forsa Defeza Timor-Leste (F-FDTL) Brigadeiro Jenerál José da Costa Soares “Trix” ba jornalista sira iha salaun Kuartel Jeneral F-FDTL Fatuhada, Dili, Tersa (21/07/2026).
Nia deklara, enkoraja partisipante feto no mane ho espasu ida nee ho reflesaun sira hodi hetan benefisiu husi diversidade esperensia no perspetiva neebe ho karakteriza iha fileira.
“Hau enkoraja liu-liu partisipasaun ativa husi ita-nia militar sira, feto no mane, iha nivel heraekiku hotu-hotu, atu nunee espasu ba reflesaun ida nee hetan benefisiu tomak husi diversidade esperiensia no perspetiva sira neebe karakteriza ita-nia fileira,” nia esplika.
Nia subliña tan katak, agradese klean ba UN Women no parseiru internasional sira ho konfiansa kontinua apoiu no dedikasaun sira ba Timor-Leste harii setor defeza ida neebe kompotente,etikamente responsável no transformativu ba jéneru.
Nia hatutan, modernizasaun defeza Timor Leste nian labele dissosia husi valor sira neebe define ita nuudar nasaun, reziliensia, solidariedade, no respeitu ba dignidade umana Intelijensia artifisiál sei sai deit util loloos ba F-FDTL too pontu neebe nia reflete ho fidelidade, agradesimentu klean ba UN Women no Governu Kanada nian ba Adidu Defeza iha Jakarta, ba konfiansa, parseria no apoiu kontínua neebe dedika ona ba Timor Leste.
“Hau iha serteza katak kolókiu ida nee sei marka pasu firme ida tan hodi harii setór defeza ida neebe kompetente teknolojikamente, etikamente responsavel no transformativu duni ba jeneru.Tanba nee hau deklara kolókiu” Intelijensia Artifisiál ba Paz Inkluzivu” nakloke, hodi dezeja ba partisipante hotu-hotu loron rua ho susesu,” nia afirma.
Entretantu partisipa iha serimonia abertura nee hanesan Xefe Estadu Maior F-FDTL, Xefe Gabinete Ministeriu Defeza, Reprezentante UN Women iha Timor Leste, Adidu Defeza Kanada, Reprezentante Komandante Komponente no Unidade, Diretór Jerál no Diretór Nasional Ministeriu Defeza, Xefe Divizaun F-FDTL, Ofisiais, sargento no prasas F-FDTL sira.
(jen)
