DILI, STLTIMORLESTE.com – Estudantes balun husi ESTV-IT 28 de Novembro Becora-Díli seidauk partisipa iha ezame modular.
Informasaun nee hatoo husi Diretor Eskola ESTV-IT 28 de Novembro Becora-Díli, Tomas Pinto ba STL iha nia knaar fatin, Kuarta nee (22/07/2026).
“Ezame modulares ami halao hotu ba ita nian estudantes sira, maibe ita nian estudantes balun neebe seidauk realiza, nee hau hanoin ba semana nee nia laran tenki realiza no estudantes neebe seidauk ezame ho razaun moras no lisensa lutu ba semana 1 nee mós estudantes tenki rekupera hodi nunee labele prejudika ba preximentu kaderneta,” nia afirma.
Tomas dehan, agora daudaun total estudantes husi sira nian eskola hamutuk 335, husi numeru nee kompostu husi departamentu haat mak hanesan arte grafica, eletronika, eletrisidade no informatika, kada loron estudantes sira ativu iha prosesu ensinu aprendizajen husi profesores sira.
“Ami nian profesores ba area produtivu sira nee, durante nee sira la partisipa iha formasaun, maibe oinsa mak profesores sira nee partisipa, hodi nunee bele aumenta konhesimentu ba ita nian profesores sira, depois ami nian profesores ba area produtivu nee ba oin presiza aumenta, tanba ami sei menus profesores, ho rekrutamentu neebe halo husi ME, nee bele responde ba eskola neebe menus manorin,” katak nia.
Nia akresenta, estudantes balun neebe mak seidauk tuir ezame modular nee, oinsa mak sira mai iha eskola para bele partisipa iha ezame modular ninia, tanba estudantes balun partisipa tiha ona iha ezame modular, agora hirak neebe seidauk nee buka meus oinsa sira mos bele partisipa iha ezame refere.
“Ita nian estudantes sira nee tuir modular mak ita bele priense sira nian valor, agora seidauk tuir ezame modular hee, oinsa mak ita atu priense sira nian valor, tanba balun neebe ho kondisaun moras, sekarik moras diak ona bele mai iha eskola hodi tuir ezame modular,” nia informa.
(jac)
