DILI, STLTIMORLESTE.com – Instituto Ciência Saúde (ICS) sei halao serimonia graduasaun ba finalista hamutuk 800 resin, maibe sei hein resposta husi Ministeriu Ensinu Superior Siensia no Kultura (MESSK).
Reitor Instituto Ciensia Saude (ICS), Leao Borges ba STL iha nia knaar fatin Balide, Kinta nee (23/07/2026) dehan, lista finalista nee ICS hatama tiha ona ba MESSK hodi hein fo resposta, maibe tuir data neebe mak iha ona katak, hahu iha fulan Agostu tinan nee sira sei halo gradusaun ba finalista sira.
“Konaba lista finalista neebe mak ami hatama ba iha MESSK nee, agora daudaun ami hein hela, nee duni iha fulan Agostu nia laran mak ami sei halao gradusaun ba ami nian finalista sira neebe mak remata ona sira nian estudu, konaba resposta nee hau sei konfirma fali ho parte akademika nian, tanba husi MESSK too agora seidauk fo resposta ba ami nian pedidu neebe mak ami hatama ona,”nia informa.
Reitor ICS nee hatutan, graduasaun ICS nian ba finalista sira nee sei akontese iha fulan Agostu tinan ida nee nia laran, sei halo graduasaun ba finalista hamutuk 800 resin, husi numeru nee kompostu husi departamentu lima, nee mak hanesan infarmajen, parteira, farmacia, nutrisaun ho Siensia biomedika laboratoriu.
“Konaba resposta husi MESSK ninia, ami nian parte hein deit bainhira mak fo resposta, lista nee ami hatama dezde iha fulan hirak liu ba, no too agora seidauk hetan resposta husi ita nian MESSK,” nia dehan.
Nunee mos Domingos Barros hanesan Diretor Jeral Ensino Superior no Siensia katak, MESSK simu ona lista finalista neebe atu halo gradusaun husi ensinu superior tolu, inklui UNTL neebe realiza tiha ona serimonia gradusaun.
“Sobre lista finalista sira ba graduasaun UNTL mak primeiru periodu foin remata, sira seluk pedidu foin mak mai ministeriu, agora UNITAL mak update ona, hau hanoin ita nian ensinu superior seluk sei iha faze tuir mai. Konaba ICS mos pedidu tama ona agora ekipa halo hela validasaun ba lista sira nee. Pedidu foin tama nee husi Universidade 3 mak hanesan ohin hau temi nee, la inklui UNTL tama foin hotu,” nia akresenta.
(jac)
