DILI, STLTIMORLESTE.com – Ensinu Superior sira nafatin esforsu aan hodi hadia kualidade nee bele diak liu tan, prepara ninia rekursu neebe diak.
“Nee mak ita esforsu para ita nian kualidade nee bele diak no haruka dosentes sira ba foti mestradu no doutoramentu iha rai liur, ita bele dehan seidauk masimu, maibe esforsu nafatin para bele kompete ho ita nian vizinhu sira ASEAN ninia, tanba ami sempre prontu atu kompete ho universidade iha rai liur,” dehan Reitor Instituto Ciência Saúde (ICS), Leao Borges ba STL iha nia knaar fatin Balide, Sesta nee (24/07/2026).
Reitor ICS nee dehan, maske daudaun nee kualidade nee seidauk masimu, maibe oinsa mak ensinu superior idak-idak nafatin hakas aan para bele hetan kualidade neebe diak, liu-liu kapasita nafatin rekursu neebe daudaun nee iha, tanba TL adere ona ba ASEAN, nee hakarak ka lakohi tenke iha kompetisaun.
“Ita tenke hadia ita nian kualidade nee ho diak para bele prepara ita nian rekursu neebe ho kualidade, hodi kompete ho universidade rai liur, tanba ita adere ona ba iha ASEAN nee sempre ita halo kompetisaun,” dehan nia.
Nunee mos Reitor DIT, Salustiano dos Reis Piedade hatete, dosentes husi DIT hamutuk 21 kontinua sira nian estudu iha rai liur, sira nain 17 nee haruka dezde iha tinan 3 tui-tuir malu, maibe tinan nee haruka tan dosente husi enginaria nain 4, jestaun no negósiu nain 1 ba foti programa dotoramentu, nain 4 ba Indonezia no nain 1 ba Malazia.
“Agora daudaun dosentes DIT neebe mak estudu iha rai liur hamutuk 17. Husi 17 nee, nain 3 estuda iha Portugal, nain 4 estuda iha Brazil, nain 10 estuda iha Indonezia. Sira kontinua estudu iha area petroliferu, egosiasaun nomos ba lingua português no inglês,” nia esplika.
Nia dehan, MESSK nian preokupasaun ida mak atu dezenvolve diak liu tan lingua português nee, entaun haruka dosentes sira nee balun ba estudu iha lingua português ninia, maibe sira neebe ba Indonezia nee iha area inglês, maibe barak liu mak ba iha lingua português.
(jac)
