DILI, STLTIMORLESTE.com – Hakarak ka lakohi tenke aplika lian ofisial tetum no português iha eskola ida-idak, atu nunee estudantes sira bele aprende diak liu tan lian refere.
“Klaru katak ita nian lian português no tetun eskola sira hakarak ka lakohi tenki aplika iha eskola sira, maibe ita nian eskola sira neebe mak manorin sira nafatin uza lian tetum nee mos lian ofisial hotu, lingua ofisial português no tetum bazeia ba konstituisaun RDTL iha artigu 13 neebe mak hakerek ona iha neeba,” dehan Superintendente Edukasaun Munisípiu Dili, Cesarina C. Guterres ba STL iha nia knaar fatin, Tersa nee (28/07/2026).
Nia dehan, formasaun ba reforma kurikulu ba klase 8 ano ba materia lingua português sei realiza iha fulan Setembru 2026, nee duni lian ofisial tetum no português neebe mak durante nee manorin sira uza iha prosesu ensinu aprendizajen ninia.
Nunee mos profesor husi EBC Fatumeta, Feliciano Gusmao hatete, lingua português importante atu aplika iha eskola hotu-hotu, hodi nunee estudantes sira bele aprende koalia no iha fatin neebe deit sira iha ba, bainhira remata estudu, ba too iha ensinu superior mos sira bele iha konhesimentu ba língua refere.
“Tanba ita nian língua português sai hanesan lian ofisial iha Timor Leste no sai hanesan mos lian iha CPLP nian, nunee ita nian estudante sira tenki aprende duni hodi nunee aban bainrua sira bele implementa iha sira nia moris,” nia esplika.
Feliciano hatutan, konaba lian português nee nia rasik tuir ona iha UNTL, konaba mestradu nian no lian ba bacharelatu mos tuir hotu kedas ona. Konaba lian português nee nia aprende husi kedas tempu português nia iha 1970 too halai ba ai laran.
“Neebe ba hau, lian português la iha problema. Hau tuir kursus husi kedas 2000 mai too ba tan iha UNTL tinan 2015 foti mestradu lian português. Neebe ba hau lian português la iha problema, iha tan sertifikadu lian português B1, B2, sertifikadu português nian nee barak los ona,” nia dehan.
Iha fatin seluk, Diretor Eskola Sekundariu Nobel da Paz, Jeremias P. de Jesus hatete, lian ofisial TL nian mak tetum no português, nunee estudantes sira presiza aprende lian ida nee, liu husi ensinu aprendizajen neebe halao husi profesores sira.
“Ita nia lian ofisial TL nian mak tetum no português, nunee estudantes sira presiza aprende lian ida nee, liu husi ensinu aprendizajen neebe halao husi profesores sira, oinsa ita nian profesores sira nee bele partisipa iha formasaun lian português, hodi nunee iha konhesimentu neebe diak ba língua ida nee,” dehan nia.
Nia dehan, nuudar fundador atual Diretor Eskola Nobel da Paz husu nafatin profesor sira, oinsa mak promove nafatin lian ofisial iha prosesu ensinu aprendizajen ba estudantes sira, atu nunee estudantes sira bele aprende no koalia diak liu tan lian ida nee.
(jac)
