DILI, STLTIMORLESTE.com – Profesor kestiona laiha mudansa ba sira nian eskalaun, maske subsidiu transporte kada fulan nee lao normal hela.
Haktuir profesor husi Ensinu Baziku Central (EBC) Fatumeta, Feliciano Gusmão ba STL iha nia knaar fatin, Kuarta nee (29/07/2026).
“Hau hanoin konaba subsidiu transporte nian nee lao normal hela, maibe konaba eskalaun nee mak husi 2015 too agora laiha mudansa, tanba kada tinan iha avaliasaun dezempenhu tinan rua rua sae, maibe too agora ME la iha liu vontade atu hadia eskalaun nee. Dala barak husi ME parte rekursu humanu dehan atu hasae ba iha grau A, maibe too ohin loron la aplika,” katak nia.
Feliciano dehan, kada tinan rua tenki iha mudansa ba osan hanesan eskalaun nian, tanba eskalaun nee hanesan nivel, tinan rua tenke sae tuir tabela nee, sira 2015 iha ona eskalaun 6 ho osan 400, maibe too agora seidauk iha mudansa. Tinan 11 ona seidauk iha mudansa salariu.
“Lo-loos nee ami ba ona eskalaun 5 osan 600, konaba foin daudaun maluk sira ba ona iha parlametu, maibe seidauk nafatin, ami ba ona iha ME, maibe sira dehan hein deit, no hein too agora laiha nafatin mudansa,” nia dehan.
Nunee mos Diretor Ensinu Baziku Central (EBC) Manleuana, Carlos Correia dehan, konaba eskalaun nee depende deit, tanba balun ba iha eskalaun 4,5 no balun ho eskalaun 6, balun ho grau C, maibe ho grau C nee seidauk, tanba mudansa ba eskalaun ou lae nee depende ba iha profesores ida-idak nian.
“Salariu nee tama iha kada profesores sira nian konta bankaria ida-idak nian, dala ruma profesores sira mos la fo hatene ita, tanba osan nee tama iha konta bankaria profesores sira nian, nee duni sira mak hatene liu katak, sira nian eskalaun nee rasik mudansa ka lae, nee depende ba sira ida-idak nian,” nia dehan.
Carlos hatete, nuudar Diretor dala ruma husu asuntu ida nee ba profesores sira nee, maibe sira rasik mos la hatene nee, dala ruma husu dehan katak profesor sira nian salariu nee diferente ka lae, sekuandu sira simu ona eskalaun husi 4 ba ona 5 nee, tanba nee sira rasik mak hatene klean konaba asuntu nee.
“Hau hanoin foin daudaun nee husi Ministeriu Edukasaun liu husi rekursu umanu fo sai ona katak, iha tempu badak nia laran nee sei halo pagamentu ba iha profesores sira nian eskalaun, nee tanba ita nian profesores sira nee balun ho eskalaun 5 no balun mak ho eskalaun 6, iha retirativu seidauk simu,” tenik nia.
Aleinde koalia konaba eskalaun, fo resposta mos kona-ba sira nian relatóriu konsesaun eskolar neebe mak sira submete ona ba Edukasaun Munisipiu Dili, tanba bainhira remata ezekusaun, eskola sira tenke halo fali relatóriu konsesaun eskolar nee ba hatama fali iha Ministériu Edukasaun.
“Iha Dili laran nee ami mak hatama uluk relatóriu konsesaun eskolar nee ba ita nian Ministériu Edukasaun, atu nunee ami bele hetan fali osan ida nee, tanba bainhira ita ezekuta hotu osan nee, ita tenke halo fali relatóriu para ba hatama fali iha Ministériu Edukasaun, nee duni ami submete ona,” katak nia.
Iha fatin seluk, Diretor Nasional Rekursu Umanu iha ME, João Amaral dehan, agora daudaun seidauk bele fo komentariu ba media, tanba sei okupadu hela ho servisu, bainhira iha tempu mak husu media sira bele halo intervista.
“Agora daudaun hau seidauk bele fo komentariu ba media, tanba hau sei okupadu hela ho servisu, bainhira iha tempu mak husu media sira bele mai halo intervista ho hau, tanba nee hau iha tempu mak kontaktu ita boot sira mai halo intervista,” dehan nia.
(jac)
