DILI, STLTIMORLESTE.com – Daudaun nee manorin nain rua (2) husi Ensinu Baziku Central (EBC) Manleuana la ativu hanorin estudantes iha sala de aula, tanba ho kondisaun moras no ida seluk tama idade reforma.
Haktuir Diretor Ensinu Baziku Central Manleuana, Carlos Correia ba STL iha nia knaar fatin, Kuarta nee (29/07/2026).
“Hau hanoin ami nian profesores nee moras iha nain rua, nain ida mak tama ba idade reforma ninia, tanba atu tama ba fulan Julhu nee nia atu la tama hanorin ita nian estudantes sira, maibe iha fulan Janeiru too fulan Junhu nee sei mai hanorin, maibe agora dala ruma ninia salariu ida ativu nee la tama ona,” dehan nia.
Nia dehan, nee duni dia 1 ho 2 fulanJulhu nee la tama hanorin ona, profesores nain rua neebe mak ho kondisaun moras, nee durante tinan rua ona mak ativu hanorin estudantes sira iha eskola, tanba nee tinan barak ona sira nain rua la ativu hanorin estudantes sira.
“Nain rua nee moras kleur ona, tanba ida seluk nee moras komplikadu los, tensaun, fuan, strok, ida seluk mos strok hotu, ida moras kuaze tinan rua resin ona no ida seluk tinan hitu ou ualu ona. Konaba asuntu nee hau informa ona ba Rekursu Umanu, maibe sira dehan moras prelongada nee seidauk iha desizaun ida,” nia esplika.
Carlos dehan, atu subtitui fali iha sira nian fatin nee mak foin daudaun bolsa kandidatu profesores nain ualu neebe husi ME koloka ona mai iha sira nian eskola, nee duni sira mak sei substitui iha sira nian fatin, daudaun nee total profesores hamutuk 53, nee sura ho Diretor ho adjuntu eskola.
“Ita husu para ita nian profesores kada disiplina ida-idak nafatin halo planu de aula, tanba ita nian inspetor eskolar sira nafatin halo kontrola sira iha sala de aula, nee ita nian profesor sira presiza aprezenta,” nia esplika.
Iha fatin seluk, Diretor Servisu Edukasaun Munisipiu Liquiça, Julio da Silva dehan, tuir dadus rejista neebe iha profesor hamutuk 125 neebe mak tama ona ba idade reformadu, konaba profesores neebe ho kondisaun moras no la ativu hanorin nee presiza haree didiak ninia dadus mak bele fo informasaun.
“Dadus neebe ita submete ona ba Ministeriu Edukasaun, ita iha total profesor reformadu hamutuk 125. Sira seidauk hatama karta rekerimentu ba iha Ministeriu Edukasaun, maibe sira hein deit lei reforma obrigatoriu,” dehan nia.
Entretantu Diretor Servisu Edukasaun Munisipiu Ainaro, Patricio da Costa Magno hatete, profesor iha Ainaro mos hamutuk 129 mak tama ona ba idade reformadu no profesores husi eskola idak-idak prepara planu de aula molok sira halo prosesu ensinu aprendizajen ba estudantes sira.
“Iha Ainaro profesor hamutuk 129 mak tama ba idade reformadu kompostu husi mane 79, feto 50. Husi nivel pre-eskolar nain 4, ensinu baziku 120, ensinu sekundariu jeral 5,” dehan nia.
Profesor neebe mate ona hamutuk 70. Mane 43, feto 32. Moras permanente 11, feto 3 mane 8.
(jac)
