DILI, STLTIMORLESTE.com – Eskola Sekundariu Nobel da Paz sempre aplika regras ba estudantes sira neebe falta la tama eskola no tama tarde.
Haktuir Diretor Eskola Sekundariu Nobel da Paz, Jeremias P. de Jesus ba STL iha nia knaar fatin, Segunda nee (03/08/2026).
“Hau hanoin durante nee ami aplika nafatin ami nian regras husi eskola neebe mak iha ona ba ita nian estudantes sira, tanba oinsa mak ita nian estudantes sira bele kumpri regras hirak nee, labele falta eskola no labele tama tarde, sekarik ita nian estudantes neebe mak la kumpri regras sira nee mak halo karta ba ita nian estudantes sira nian inan aman para bele toma atensaun ba oan sira,” dehan nia.
Tuir Jeremias, durante nee dala ruma estudantes sira dader sai husi uma mai iha eskola, maibe too iha eskola sira la tama aula, sira iha liur deit too oras fila ba uma, ida nee inan aman presiza fo hanoin nafatin ba sira nia oan para labarik sira mai eskola nee tama aula, nuudar diretor sempre fo hanoin nafatin ba estudantes sira.
“Sekuandu mai iha eskola mak la tama aula, nee ita konsidera sira falta nafatin, tanba mai la tuir aprendizajen husi ita nian profesor sira, mai hakarak hamriik iha liur deit nee falta, kuandu falta beibeik mak ami sei bolu sira nia inan aman mai iha eskola hodi koalia ho sira nian inan aman sira bele hatene,” nia dehan.
Entretantu Deonisio Marques Nunes nuudar estudante husi Eskola Sekundariu Nobel da Paz dehan, durante nee nunka falta eskola, dader sempre mai sedu eskola, maibe bainhira moras no iha asuntu seluk nafatin fo informasaun ba xefi da turma, atu nunee iha lista prezensa nee labele tau falta.
“Durante nee nunka falta eskola, dader sempre mai sedu eskola, maibe bainhira moras no iha asuntu seluk nafatin fo informasaun ba xefi da turma, atu nunee bele hatene no lista prezensa nee labele tau falta,” nia dehan.
Nunee mos Isabel Nunes Maia hanesan estudante dehan, dader sira tama eskola tuku 8:00, nee duni tuku 7:30 tenke iha ona eskola, atu nunee labele tarde, tanba bainhira tarde ona nee labele tama, entaun nee lakon materia husi profesor sira.
“Ita nuudar estudantes dader nee tenke mai sedu eskola, atu nunee bele tuir aprendizajem husi ita nian profesor sira, sekarik ita mai eskola la tama aula nee ita mak lakon materia husi ita nian profesores sira,” dehan nia.
(jac)
