DILI, STLTIMORLESTE.com – Eskola Sekundariu Jeral FINANTIL (ESJ) antes feriadu submete ona relatoriu konsesaun eskolar faze daruak nian ba Ministeriu Edukasaun, no agora daudaun hein fali konsesaun eskolar ba terseiru periodu.
Liafuan nee hatoo husi Diretor Eskola Sekundariu Jeral FINANTIL, Aniceto Berlelo ba STL, Tersa nee (04/08/2026) katak, sira nian relatoriu konaba konsesaun eskolar ba faze daruak nian nee, antes feriadu sira hatama tiha ona ba Ministeriu Edukasaun, nee duni antes feriadu sira submete ona relatoriu konsesaun eskolar ba segundu periodu nee hatama ona.
“Agora ami hein fali konsesaun eskolar ba iha terseiru periodu ninia, tanba konsesaun eskolar terseiru periodu nian nee agora daudaun iha prosesu nia laran, tanba prosesu hotu ona no osan iha tiha ona, nee duni hein deit, tanba sei hein fali eskola balun neebe seidauk hatama sira nian relatoriu nee ba ita nian Ministeriu Edukasaun, oinsa mak husi Ministeriu Edukasaun atu atribui konsesauneskolar, bainhira ezekuta hotu konsesaun eskolar nee ita tenke submete hikas relatoriu nee,” nia informa.
Nia dehan, konsesaun eskolar ba segundu periodu nian nee sira ezekuta ba iha ezame ninia deit, nee mak ninia relatoriu nee antes tama feriadu nee husi parte eskola haruka ona relatoriu ba iha Ministeriu Edukasaun, ho nunee husi Ministeriu Edukasaun bele prosesa fali konsesaun eskolar terseiru periodu ninia nee ba iha eskola sira, no eskola balun seidauk hatama relatoriu.
“Sekuandu ita nian eskola balun neebe seidauk hatama relatoriu, nee husi Ministeriu Edukasaun sei hein relatoriu sira nee husi parte eskola, bainhira hatama hotu mak Ministeriu Edukasaun bele atribui fali konsesaun eskolar ba terseiru periodu nian,” nia dehan.
(jac)
