DILI, STLTIMORLESTE.com – Hospital Nasional Guido Valadares (HNGV) liu husi Deprtamentu Medisina Legal Forensik iha Janeiru too Julhu 2026 halo autopsia hamutuk 54 kazu.
Xefe Departamentu Forensik HNGV, Doutor Nilton Tilman hatete, totalmente prosedimentu autopsia neebe halo iha fulan 7 nia laran, husi Janeiru too mai Julhu nee porvolta 54 kazu, husi numeru nee tipu kualidade kazu neebe boot liu mak kazu oho aan.
Husi Janeiru mai too Julhu total kazu omisidiu hamutuk 16, balun sei iha hela investigasaun nia laran. Depois asidente 5 no oho aan iha 12, sei iha tan kazu 12 mak seidauk bele determina nia kauza.
Nia katak, iha segundu trimestre dadus medisina legal neebe mak akontese iha durante fulan Maiu too Julhu nia laran.
“Iha Maiu 2025 nia laran felismente ninia akontesimentu no autopsia nia numeru ladun boot mak iha 6 deit. Neebe mak halo ba kazu iha omisidiu vitima mane 1, oho aan vitima mane 1, mate natural 1 katak ita mak ba rekolha mai. Felismente asidente laiha, seluk sei iha prosesu investigasaun nia laran. Iha Junhu mak numeru nee sae kedas ba 100%, neebe husi Maiu ho numeru 6 sae kedas ba 11. Kompostu husi kazu oho malu 3 no kazu oho aan 5, asidente 1 no kazu 2 mak sei iha prosesu nia laran. Kazu sira nee involve mane 6 no feto nain 5,” dehan nia ba jornalista sira iha HNGV Bidau, Kuarta (05/08/2026).
Nia hatutan, iha Julhu nee diak fali tanba tun fali mai kazu 6 kompostu husi omisidiu husi mane 1, oho aan 2 feto ida no mane 1, mate natural laiha, asidenti 1 no kazu sira seluk sei iha investigasaun nia laran. Portantu total kazu iha 6 ba vitima mane 4 no feto 2.
Tuir nia, haree ba kazu nee hanesan alarma ida ba governu no estadu atu haree ba buat nee. Neebe involve mos ema hotu neebe mak iha relasaun nee liu-liu inan aman sira, ONG husi hospital rasik, liu-liu parte saude atu tau matan ba kazu nee tanba nia numeru nee aumenta makaas iha kuantidade nomos kualidade.
“Kuantidade nee katak nia numeru nee sae no kualidade nee maioria ba labarik sira tara aan, hemu beneno ho halo video,” tenik nia.
Nia afirma, labarik idade produtivu ho idade bot liu mak 26, no kiik liu mak 14 ona. Maioria mai husi Munisipiu Dili no Ermera nee la dok malu, munisipiu rua nee hadau malu deit. Dala ruma Ermera liu fali tiha Dili, seluk nee kuaze distritu hotu iha.
Nia haktuir, ida nee situasaun ida neebe seriu ba nasaun ida nee atu governante sira atu tau matan . Ho idade mesak produtivu ema hotu tenke preokupa, liuliu inan aman sira. Mate isin sira neebe halo ona autopsia, barak mak entrega ona ba familia maibe prosesu investigasaun lao hela.
(dom)
