DILI, STLTIMORLESTE.com – Ministeriu Saude (MS) kontinua tau prioridade hodi estabelese tan Sentru Saude ba komunidade sira iha area remotas, liu-liu iha postu administrativu foun neebe foin mak eziste.
Lia hirak nee hatoo husi Diretór Jerál Servisu Korporativus iha Ministeriu Saude, Narcisio Fernandes, iha serimonia entrega Sentru Internamentu neebe oferese husi Governu Australia, liu husi programa kooperasaun defeza ba Komando FALINTIL-Forsa Defeza Timor Leste (F-FDTL), hodi uza ba Serví Veteranu no Militar sira, iha Metinaro.
“Agora atu espande tan Sentru Saude foun ba iha Loes, hanesan Postu Administrativu foun, Sentru Saude nebee uluk iha Maubisse, agora estabelese tan, Sentru Saude rua tan atu tau iha Quelicai, tanba Quelicai Postu Administrativu foun rua nebee mak establese, nomos sentru saude foun iha lore 2 iha Lautem nian, Lospalos,” hatete Diretór Jerál Servisu Korporativus iha Ministeriu Saude, Narcisio Fernandes ba jornalista sira iha nia knaar fatin, Kuarta (05/08/2026).
Nia mos dehan tan, dezenvolvimentu ida nee kontinua nafatin, iha sistema nasional saude, agora daudaun estabelese Hospital Referal hamutuk 5, inklui HoREX Baucau hanesan hospital regional.
Konaba fasilidade iha Hospital Nasional Guido Valadares (HNGV) liu-liu kama atu responde ba pasiente sira iha nasaun laran la sufisiente, tanba atu responde kama ba populasaun iha TL, minimu tenke iha kama 1800 atu responde ba populasaun, maibe agora daudaun kama la sufisiente, kama iha fasilidade sira foin mak too 800.
“Demande ba nesediade komunidade sei nafatin aas, nunee ami nia esperansa boot, ho Sentru Internamentu ida nee sei espande ho kama, nunee atu bele kontinua kontribui ba sistema nasional saude, liu-liu ba internamentu neebe mak sei iha, futuru mai sei bele hela nomos bele fo atendimentu iha nee,”nia tenik.
Nia esplika, nafatin servsiu hamutuk, kolabora ba malu ho Profisional Saude sira, liu-liu ba Forsa Defeza nian ba oin, no MS kontinua apoiu, kolabora liu husi HNGV neebe mak prontu nafatin fo apoiu tuir nesesidade, tuir kapasidade neebe agora daudaun HNGV iha.
Nia deklara,.MS servisu hamutuk ho unidade Saude Forsa Defeza nian, sempre kontaktu ba malu husi inisiu, katak servisu neebe hahu ho inisiu neebe limitasoens barak, agora iha ona pasu pozitivu neebe mak hatudu.katak servisu parseria entre F-FDTL ho MS hahu daudaun iha HNGV.
MS mos rekonhese katak, iha difikuldade neebe mak sempre hasoru iha terenu, maibe servsiu nafatin lao ho diak entre ekipa husi F-FDTL hamutuk ho HNGV neebe mak lao diak tebes.
Iha fatin hanesan, Abelita dos Santos nuudar inan isin rua informa, iha Suku Serelau Sentru Saude iha maibe ekipamentus laiha no mediku mos laiha, tanba nee husu ba Ministru Saude tenke tau atensaun ba ida nee.
“Ami iha neeba Sentru Saude iha maibe distansia Sentru Saude dook liu ami nia hela fatin, depois estrada mos aat, tanba nee bele harii Sentru Saude ida iha ami nia Aldeia Adavari nee, atu nunee inan isin rua no labaraik inklui pasiente sira seluk bele konsulta lalais,” nia informa.
Nunee, Akademista UNTL Julio da Costa informa, Sentru Saude iha kada suku tenke iha atu nunee bele fo atendimentu saude ba komunidade sira, tanba setor saude daudaun nee lao lentu demais.
“Ita haree iha Suku ou Postu Administrativu laiha Ambulasia, tanba nee inan feton balun tenke hulan mai iha hospital referal tanba kareta ambunasia avaria, tanba nee Sentru Saude iha Suku no Postu nee importante ba ita,” nia afirma.
(jen)
