DILI, STLTIMORLESTE.com – Projetor no komputador neebe mak hetan apoiu husi Ministeriu Eduksaun (ME) nee seidauk sufisiente hodi fasilita profesor sira halao prosesu ensinu aprendizajen.
“Projetor neebe mak ajuda husi ME rasik, hau hatama ona iha ME, maibe ninia rezultadu mak hanesan nee ona, projetor no komputador 12, momentu neeba ema naok rua, maibe liu husi lideransa komunitaria depois liu husi parte polisia too ikus hetan projetor rua neebe mak lakon nee,” dehan Diretor ESJ nu. 4 Setembru Balide, Sergio A. da Cruz ba STL iha nia knaar fatin Kinta nee (06/08/2026).
Sergio dehan, se ema naok nee atu dun ba se, problema ida mak komunidade sira neebe mak hela iha parte kotuk, ami nian projetor nee deit sira presiza tan projetor 12, no 12 mak seidauk iha, projetor nee seidauk sufisiente.
Entretantu Diretor Eskola Sekundariu Jeral FINANTIL, Aniceto Berlelo dehan, profesores kada materia husi Eskola Sekundáriu Jeral FINANTIL hahu uza projetor ba iha prosesu ensinu aprendizajen ba estudantes sira.
“Ami iha ona mudansa, tanba ami nian sala uza ona projetor, tanba nee ami nian profesores sira halao aprendizajen nee uza ona projetor deit, tanba ami instala hotu ona iha ami nian sala aprendizajen neen, no sira seluk neebe mak seidauk nee uza projetor movel, nee uza ba iha materia hotu, husi kada profesores ida-idak nee uza hotu projetor,” tenik nia.
Nia dehan, uza projetor nee hahu iha fulan Janeiru tinan ida nee, tanba husi ME halo distribuisaun dijitalizasaun ba iha sira nian eskola, nee duni fulan rua tolu mai kada estudantes mai eskola tenke lori ho telefone, lori livru nafatin inklui lori ho laptop, atu nunee estudantes sira mos bele halo pratika.
“Dala ruma profesor ida rai hela materia ba sira, atu nunee estudantes sira mak halo operasaun, durante iha implementasaun ba digitalizasaun nee, prezensa estudantes sira nian kada loron iha eskola kapas tebes, tanba sira gosta, tanba nuudar estudantes nee hakarak ba oin, laos atu ba fali kotuk,” nia afirma.
Nunee mos Diretor Eskola Sekundariu Jeral 10 Dezembru Comoro, Manuel Verdial dehan, sira nian ensinu aprendizajen sei nafatin hanesan baibain, tanba sira seidauk hetan projetor, maske eskola públiku balun mak hetan ona.
“Hau hanoin ami nian eskola la hetan projetor, maibe ita nian eskola seluk agora daudaun halao aprendizajen nee hahu uza ona dijitalizasaun, tanba hetan fasilidade husi ita nian ministériu, maibe ami nian eskola rasik seidauk hetan,” nia esplika.
(jac)
