DILI, STLTIMORLESTE.com – Ministeriu Edukasaun (ME) asina MoU ho Federasaun Atletizmu Timor Leste, hodi reforsa atividades atletizmu iha eskola.
Ministra Edukasaun, Dulce de Jesus Soares reprezenta Ministériu Edukasaun (ME) hodi asina hamutuk ho Federasaun Atletizmu Timor Leste (FATL) Memorandu Entendimentu (MoU) hodi reforsa no dezenvolve atividade atletizmu iha eskola sira iha territóriu Timor Leste tomak, ho foku espesial ba labarik sira ho idade 4 – 14 anos liu husi programa Kid’s Athletics.
Serimónia asina MoU nee hala’o iha salaun Ministériu Edukasaun, Kinta (06/08/2026) no hetan prezensa husi konvidadu espesiál sira husi asian Athletics, neebe too iha Dili iha lorokraik ohin. Delegasaun Asian Athletics lidera husi Dahlan Jaman B. Al-Mahad – Prezidente Asian Athletics akompaña husi Sr. A. Shuggumarhan – Sekretáriu Jerál Asian Athletics no Sr. Irfan Ibrahim – Asistente Prezidente.Husi parte nasionál, partisipa Sr. Afranio Xavier Amaral – Prezidente FATL Sra. Marlia L.P. Moniz – Sekretária Jerál FATLno ekipa tomak, hamutuk ho ofisiál prinsipál sira husi Ministériu Edukasaun.
Rekoñesimentu ba importánsia atletizmu: Atletizmu nu’udar modalidade bázika ba desportu hotu-hotu. La’os de’it kona-ba halai lalais, haksoit aas, ka soe dook, maibé mós hanorin valór disiplina, respeitu ba malu, no espíritu atu hamriik fali bainhira monu. Implementasaun iha eskola, iha Pré-Eskolár Introdús jogu simples ho movimentu báziku – korida ki’ik, saltu ki’ik, no lansamentu simples ne’ebé foku ba diverte. Iha Ensinu Báziku: Habelar abilidade motorika ho korida, saltu/haksoit no soe ho ekipamentu adaptadu ne’ebé foku ba partisipasaun no aprendizajen. Atualizasaun ba kuríkulu: Ministériu Edukasaun sei atualiza nafatin matéria disiplina Edukasaun Fizika iha Kuríkulu Nasionál atu aliña ho programa ne’e.Identifikasaun sedu ba talentu: Servisu hamutuk hodi hahú identifika labarik sira ne’ebé iha talentu iha atletismu hahú husi idade ki’ik.Apoiu tékniku: Liu husi parseria ho FATL no Asian Athletics, Ministériu Edukasaun espera hetan apoiu iha formasaun ba profesór Edukasaun Fizika no ekipamentu apropriadu ba labarik sira.
Ministra Dulce de Jesus Soares hatete katak, kooperasaun ne’e nu’udar investimentu ba futuru labarik sira.
“Ho MoU ne’e ita hakarak garante katak atividade atletismu bele la’o to’o iha eskola hotu, hodi forma labarik sira ne’ebé saudavel, disiplinadu no iha espíritu desportivu. Governu komprometidu atu servisu hamutuk ho federasaun no parseiru internasionál sira hodi dezenvolve desportu nasionál,” nia dehan.
ME Dulce fiar katak ho kooperasaun ne’e Timor Leste sei bele prodús jerasaun foun ho kualidade iha área atletismu no kontribui ba dezenvolvimentu desportu nasionál.
Ministériu Edukasaun hato’o agradesimentu ba Federasaun Atletismu Timor Leste no Asian Athletics ba apoiu no kompromisu hamutuk hodi hari’i baze forte ba desportu iha eskola.
(jac)
