DILI, STLTIMORLESTE.com – Atu responde diversifikasaun no kresimentu ekonomia tanba rekursu humanu neebe Timor Leste iha sei menus tebes, tanba nee Fundu Desenvolvimentu Capital Humanu (FDCH) hamutuk ho Konselhu Administrasaun esforsu atu hasae Orsamentu Jeral Estadu (OJE) ba tinan 2027 no 2028.
Liafuan nee haktuir husi Diretor Ezekutivu FDCH, Julio Aparicio iha ambitu serimonia despedida bolseiru meritu nain 140 iha salaun Multiuosos GMN Bebora, Kinta (0608/2026).
Nia hatete, maske haruka ona bolseriu sira iha area estudu oioin maibe hirak nee seidauk bele responde diversifikasaun no kresimentu ekonomia, tanba rekursu humanu neebe TL iha sei menus tebes. Kuantidade bele makas maibe kualidade presiza haree.
“Ho ida nee mak ami hamutuk ho konselhu administrasaun esforsu atu hasae orsamentu geral do estadu ba tinan 2027 no 2028, hodi prepara kapital humanu ida neebe forte para kompete iha mundu internasional iha area enjenaria, teknolojia no industria,” dehan nia.
Nia afirma, iha observasaun FDCH nian katak Planu Estratejika Desenvolvimentu (PED) 2012-2030 seidauk bele atinzi 100% tan deit menus rekursu humanu hodi implementa PED nee rasik, liu-liu iha area 3 neebe temi ona.
“Ami iha esperansa katak tinan 5 too 10 oin mai ita iha ona rekursu humanu neebe naton hodi solusiona problema no desafiu neebe ita hasoru,” tenik nia.
Tuir Diretir nee katak, dadus neebe FDCH iha hasoru dezafiu hirak neebe mak hanesan primeiru kurikulu edukasaun tantu ensinu baziku, ensinu sekundariu too superior ladun adapta progresu kurikulu ba nasaun desenvolvidu sira. Tanba nee wainhira bolseiru sira ba universidade nasaun sira seluk sempre hasoru difikuldade boot iha tinan primeiru. Maibe keta tauk bolseiru sira iha IQ neebe diak hodi kompete progresu universidade sira nian.
Nia afirma, dezafiu seluk mak TL seidauk iha peritus iha area estudu matematika, fisika no kimika, nomos seidauk iha fasilidade no laboratorium neebe diak hodi suporta instituisaun akademik sira, tan nee defisil atu hamosu peritus iha area industria no teknolojia. Iha parte seluk hatudu katak ensinu sekundaria sira sempre lakon kompetisaun iha bolsa estudu neebe FDCH loke, tanba sira monu iha lian portugues no ingles.
Nia haktuir, babain sira neebe pasa ba nasaun CPLP mak estudante sira neebe mai husi eskola CAFE sira no sira neebe pasa ba nasaun ho lian ingles nee mak estudante sira neebe mai husi eskola internasional no eskola privadu balun nomos sira neebe eskola tiha ona iha universidade sira iha Dili maibe sira tuir tan kursu iha sentru formasaun lian ingles no portugues.
Dezafiu seluk mak ema barak seidauk iha pertensia ba FDCH, sira hakarak bolsu estudu no hakarak deit osan lakohi tuir prosedimentu no prosesu ida neebe lolos no justu.
(dom)
