DILI, STLTIMORLESTE.com – Makina CT- Scan neebe durante nee hodi fasilita servisu mediku sira halo diagnostiku ba moras iha Hospital Nasional Guido Valadares (HNGV), daudaun nee ho kondisaun avaria no labele halo operasional dezde fim de Julhu 2026.
Tuir observasaun STL iha HNGV, Segunda nee (10/08/2026) haree katak, daudaun nee makina CT-Scan iha HNGV ho kondisaun avaria ka aat hela, makina nee labele halo operasional no halo diagnostiku ba pasiente sira. Nunee fatin no kadeira neebe baibain pasiente sira tur hein hodi halo CT-Scan ba sira nia moras daudaun nee mamuk, tanba makina aat nunee pasiente sira fila fali deit.
Ministra Saude, Elia Amaral dos Reis hatete, CT-Scan nee iha ona tinan naruk nia laran. Tinan ida nee sosa ona makina CT-Scan foun iha prosesu hela hodi mai troka fali buat foun.
“CT-Scan nee kala mais tinan 10 nia laran ona, barak mak nia reazenti laiha. Neebe iha tempu badak nia laran sei monta CT- Scan foun neebe nia orsamentu aloka ba iha 2026 nian,” dehan Ministra Elia.
Nia hatete, bainhira atu aloka ekipamentu foun tenke haree mos kondisaun. Kuandu kondisaun hospital foun bele tau makina foun hodi bele garante ba tinan naruk nia laran. Agora daudaun konstrusaun pediatria mos akaba ona, instalasaun ekipamentu no agora sira halo dadaun instalasaun ekipamentu matan ba labarik, depois tuir mai fazeada sei kompleta. Nunee iha tempu badak sei informa bainhira mak bele operasionaliza ospital pediatria nee.
Nia hatutan, orsamentu neebe aloka laos deit ba DNA maibe mos haree ba teste teze nian para bele halo prevensaun antes ba bebe sira, tanba nee teste teze nee intersante tebes.
Entretantu informasaun neebe diariu nee asesu husi parte tekniku HNGV katak, ba pasiente sira neebe mak atu halo CT-Scan, iha situasaun nee sira hetan intervein direita husi mediku espesialista sira iha emerjensia case nian.
Makina CT-Scan nee monta iha tinan 2017, bele dehan makina nee besik tinan 10 ona. Agora daudaun atu troka fali foun, tanba sasan iha ona hein atu troka deit.
(dom)
