DILI, STLTIMORLESTE.com – Eskola Sekundariu Nobel da Paz no EBC la hetan apoiu husi Ministeriu Eduksaun (ME), tantu subsidiu no programa merenda eskolar.
“Konaba subsidiu ka konsesaun eskolar, durante tinan tolu ona ami la hetan osan ida nee husi governu liu husi ME, nunee mos tinan ida nee ami la hetan apoiu programa merenda eskolar husi ita nian ME, tanba ami nian eskola hanesan eskola privadu ida, neebe kada tinan povu nia oan barak mak mai eskola iha nee,” dehan Fundador Eskola Nobel da Paz, Jeremias P de Jesus ba STL iha nia knaar fatin, Tersa nee (11/08/2026).
Jeremias dehan, razaun husi ME seidauk fo konsesaun eskolar no programa merenda ba sira nian eskola, husu atu rezolve sira nian problema, maibe daudaun nee iha prosesu nian laran no sira sei hadia sira nian estatutu eskola nian, atu nunee eskola refere bele hetan apoiu husi Ministeriu Edukasaun, tanba durante tinan tolu la hetan apoiu konsesaun eskolar husi Ministeriu Edukasaun.
“Hau nuudar fundador husi eskola ida nee, espera bainhira sira hadia hotu estatutu ida nee, para ami bele halo pedidu ba Ministeriu Edukasaun, ho nunee ami bele hetan apoiu husi ita nian ministeriu, tinan nee ami nian estudantes EBC la asesu ba merenda eskolar,” nia deklara.
Iha fatin seluk, Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandes dehan, durante tinan rua ona Eskola Sekundariu Nobel da Paz la hetan konsesaun eskolar, tanba too agora eskola refere seidauk fo desizaun neebe klaru ba Diresaun Nasional Ensinu Sekundariu Jeral husi Ministeriu Edukasaun.
“Ensinu Sekundariu Novel da Paz hanesan eskola privadu ida neebe mak tinan rua ona la hetan konsesaun eskolar, tanba sira iha problema internu ida neebe mak seidauk hotu, no sira iha hela parte justisa ninia iha tribunal, seidauk fo desizaun ida mai katak, responsável konsesaun eskolar nee atu atribui los ba se, bainhira ami hetan ona justifikasaun karta husi Tribunal dehan katak eskola nee legal ba se,” nia akresenta.
Nia dehan, bainhira eskola nobel nian kazu nee hotu ona, nee sira bele hetan konsesaun eskolar hanesan ho eskola privadu sira seluk, tanba nee mak laos foin tinan ida nee, maibe tinan hirak ba kotuk mos la hetan konsesaun, dezde diretor sesante mate, entaun eskola nee iha problema internasional entre sira nian.
“Tanba nee eskola privadu ami la tau kanuru tohar no sira lori malu ba too iha Tribunal ona, desizaun ikus ami seidauk hetan, maibe buat ida konsesaun eskolar nee osan estadu nian, neebe presiza ho kriteriu ruma atu bele atribui,” nia esplika.
Benjamin hatutan, too ohin loron eskola nobel seidauk halo deklarasaun ruma hatoo mai iha ministeriu, katak osan konsesaun neebe ME atu fo apoiu nee se mak simu los,para husi parte ministeriu nian bele hatene sira nian problema rezolve los ona ka seidauk, nee husi Ministeriu Edukasaun tenke hatene ida nee, se lae sira seidauk bele hetan osan ida nee.
“Hau hanoin too ohin loron eskola nobel seidauk halo deklarasaun ruma hatoo mai iha Ministeriu, katak osan konsesaun neebe Ministeriu Edukasaun atu fo apoiu nee se mak simu los, para husi parte ministeriu nian bele hatene sira nian problema rezolve los ona ka seidauk, nee husi Ministeriu eduksaun tenke hatene ida nee, se lae sira seidauk bele hetan osan ida nee, bainhira sira rezolve problema nee los ona mak bele atribui konsesaun eskolar nee ba sira,” nia esplika.
Entretantu Diretor Eskola Sekundariu Jeral FINANTIL, Aniceto Berlelo dehan, sira nian relatoriu konaba konsesaun eskolar ba faze daruak nian nee antes feriadu sira hatama tiha ona ba Ministeriu Edukasaun, nee duni antes feriadu sira submete ona relatoriu konsesaun eskolar ba segundu periodu nee hatama ona.
“Agora ami hein fali konsesaun eskolar ba iha terseiru periodu ninia nee, tanba konsesaun eskolar terseiru periodu nian nee agora daudaun iha prosesu nian laran, tanba prosesu hotu ona no osan iha tiha ona, nee duni hein deit, tanba sei hein fali eskola balun neebe seidauk hatama sira nian relatoriu konsesaun eskolar nee ba ita nian Ministeriu Edukasaun, oinsa mak husi Ministeriu Edukasaun atu atribui konsesaun eskolar, bainhira ezekuta hotu konsesaun eskolar nee ita tenke submete hikas relatoriu nee,” nia informa.
Nia dehan, konsesaun eskolar ba segundu periodu nian nee sira ezekuta ba iha ezame ninia deit, nee mak ninia relatoriu nee antes tama feriadu, nee husi parte eskola haruka ona relatoriu ba iha ministeriu, ho nunee husi Ministeriu Edukasaun bele prosesa fali konsesaun eskolar terseiru periodu ninia nee ba iha eskola sira, no eskola balun seidauk hatama relatoriu.
“Sekuandu ita nian eskola balun neebe seidauk hatama relatoriu nee husi ME sei hein relatoriu sira nee husi parte eskola, bainhira hatama hotu mak Ministeriu Edukasaun bele atribui fali konsesaun eskolar ba terseiru periodu ninia,” nia esplika.
(jac)
