DILI, STLTIMORLESTE.com – Ema hotu preokupa ho graduadus neebe mak remata estudu iha ensinu superior, maibe barak too agora seidauk hetan servisu, tanba nee MESSK sei halo avaliasaun iha instituisaun ensinu superior.
“Ida nee hau hanoin ema hotu nia preokupasaun, tanba ligadu mos ba ita nia politika governasaun nian, maibe Ministeriu sei halo avaliasaun ba iha ita nian situasaun ida ba instituisaun ensinu superior hotu iha Timor Leste, atu nunee bele hadia kualidade de ensinu, hodi bele responde ba merkadu de trabalhu,” afirma Direitor Jeral Ensino Superior no Siensia, Domingos Barros ba jornalista STL, Kinta nee (13/08/2026).
Iha fatin hanesan, Reitor Instituto Ciensia Saude (ICS), Leao Borges dehan, parte ensinu superior sujere ba governu atu kria kondisaun loke kampu trabalhu, hodi bele absolve graduadus hirak neebe remata ninia estudu iha universidade.
“Menus empregu iha rai laran nee ita nian governu mak tenke kria kampu trabalhu ba graduadus hirak neebe remata ona sira nian estudu, nee mak ita sujere nafatin governu para bele kria kondisaun, hodi bele absolve ita nian rekursu neebe mak ita produs, tanba ita haree dezempregu iha rai laran nee sei makaas tebes, tanba nee mak ita nian joven barak ba servisu deit iha rai liur,” nia informa.
Nia dehan, tanba realidade iha TL menus kampu trabalhu ba joven sira neebe remata ona estudu iha ensinu superior sira, joven barak sai ba servisu iha rai liur, nee duni joven neebe remata sira nian estudu nee, sira barak agora ba servisu iha rai liur, tanba iha rai laran laiha servisu no laiha investimentu boot ruma hodi fo servisu ba joven.
“Los duni katak, ita nian rai nee servisu menus tebes, entaun hirak neebe kada tinan ita produs balun sai ba liur no balun too agora seidauk hetan servisu, nee mak husu governu oinsa atu kria servisu ba ita nian foin sae sira,” nia komenta.
(jac)
