DILI, STLTIMORLESTE.com – Komisaun Organizadora ba 20 Agostu hatoo agradesimentu ba povu no instituisaun neebe apoia serimónia Loron FALINTIL ba dala-51 iha Baucau susesu.
Tuir Xefe Estadu Maior FALINTIL-FDTL Brigadeiro Jeneral José da Costa Soares “Trix” hatete, Komando FALINTIL-Forsa Defeza Timor-Leste (F-FDTL) ho Ministeriu Defeza liu husi Komisaun Organizadora 20 Agostu halo konferénsia imprensa hatoo agradesimentu ba apoiu tomak husi povu no instituisaun estadu.
“Ita nia objetivu atu hatoo agradesimentu ba povu Timor Leste, entidade Estadu, privadu, instituisaun no media nasionál sira neebe fo apoiu ba realizasaun Serimónia Loron FALINTIL ba dala-51,” hatete Xefe Estadu Maior FALINTIL-FDTL Brigadeiro Jeneral José da Costa Soares “Trix” ba jornalista sira liu husi Konferensia Imprensa iha Kuartél-Jenerál F-FDTL Fatuhada, Kinta (27/08/2026).
Nia esplika, serimonia nee halao iha loron 20 Agostu 2026 iha Matebian, Kelikai, Munisípiu Baucau hodi komemora aniversáriu FALINTIL.
Nia informa, susesu atividade nee laos deit rezultadu servisu F-FDTL, maibe tanba kooperasaun, unidade no apoiu husi parte hotu.
Nia mós fo agradesimentu espesial ba média nasionál sira neebe halo kobertura no disemina informasaun ba públiku.
Nia hatoo mos kompromisu atu kontinua hametin kooperasaun ho Estadu, privadu, media no komunidade hodi proteje memoria, istoria no patrimóniu FALINTIL no Timor Leste.
(jen)
