DILI, STLTIMORLESTE.com – Tuir informasaun neebe viral iha media sosial katak, sidadaun Xineza neebe involve iha atividade Scam Call Centre balun halai sai husi Timor Leste (TL), Polísia Nasional Timor Leste (PNTL) seidauk iha informasaun.
Portavos Polísia Nasional Timor Leste (PNTL), Superintendente Xefe Polísia João Belo dos Reis ba jornalista sira liu husi Konferensia Imprensa iha Komando Jeral PNTL, Kinta nee (27/08/2026) hatete katak, sidadaun estranjeiru kuaze 100 resin neebe envolve iha krime Scam Call Center halai sai ona husi Timor-Leste nee la loos, tanba too oras nee PNTL seidauk iha informasaun klaru konaba sidadaun hirak nee halai sai ona husi Timor-Leste.
“Se mak hateten dehan sira iha rai liur, ita seidauk iha informasaun susfisiente katak, sira sai ona husi Timor-Leste,” hatete Portavos Polísia Nasional Timor-Leste (PNTL), Superintendente Xefe Polísia João Belo dos Reis.
Nia esplika, informasaun neebe PNTL hatene no buka hatene ona mak sidadaun sira nee balun servisu ona iha Loja, balun projetu, la halai sai husi Timor.
“Ita buka tuir nafatin, ita hetan ona informasaun balun katak, balun halo hela servsiu projetu, balun servsiu iha loja, neebe ita sei buka tuir sira, tuir informasaun neebe ita hetan, buka tuir sira hodi bele aprejenta. Informasaun ita bele hateten seidauk los, tanba ita seidauk iha informasaun katak sidadaun nee too ona nasaun iha nia nasaun orijen, ita sei buka tuir hela sira,” nia informa.
Nia deklara, sidadaun estranjeiru sira neebe PNTL kaer, tribunal aplika medida hira iha neeba, depois mos fahe kedan informasaun ba autoridade sira katak, ema ida nee aplika ona medida hanesan nee, karik sira iha tentativa sai husi linha Fronteira, sira hapara.
Nia koalia, PNTL nafatin halo kontrolu ba sira no orden neebe tribunal fo sai katak, sira nee laos detensaun uma nian, neebe sira iha livre atu halo movimentu iha teritoriu Timor-Leste, kuandu tribunal hatete katak sira nee laos termu identidade rezidensia, nee sira livre atu halo movimentu.
(jen)
