DILI, STLTIMORLESTE.com — Primeiru Ministru (PM), Xanana Gusmão kondena estragus panel RMU no LV iha Becora, no husu komunidade proteje infraestrutura públika sira hodi evita.
“Hau kondena maka’as asaun ema deskoñesidu ne’ebé estraga odamatan Panel RMU (Ring Main Unit) no Panel LV (Low Voltage) iha sistema eletrisidade subterráneu iha área Kuluhun-Becora, liu-liu besik Igreja Becora,” dehan Xanana iha reuniaun ikus Komité Revizaun Polítika (KRP) ba preparasaun Orsamentu Jerál Estadu (OJE) 2027, iha Auditóriu Ministériu Finansas, Aitarak-Laran, Dili, Kinta (27/08/2026).
Iha biban nee, PM Xanana halo apelu ba komunidade, liu-liu juventude, atu hametin dame no proteje infraestrutura públika tanba infraestrutura eletrisidade sira-ne’e uza osan públiku no importante ba moris loroloron komunidade.
“Governu haka’as an atu hadi’a ita-nia rain, joven sira labele sai fali kriminozu iha ita-nia rain rasik,” afirma Xefe Governu.
PM hateten katak Governu kontinua halo esforsu atu hadi’a infraestrutura no fornese eletrisidade ba populasaun, maibé asaun estraga patrimóniu públiku bele prejudika servisu no investimentu ne’ebé uza osan povu nian.
Nia mós husu Prezidente Autoridade, xefe suku, xefe aldeia no organizasaun juventude atu servisu hamutuk hodi prevene asaun sira ne’ebé bele estraga infraestrutura públika.
Xanana mós husu PAM Dili atu koordena ho autoridade postu administrativu, xefe suku no xefe aldeia, no husu PAM iha munisípiu sira seluk atu tau atensaun ba seguransa infraestrutura públika.
Prezidente Komisaun Ezekutiva Eletrisidade Timor-Leste, Empreza Públika (EDTL, E.P.), Paulo da Silva, lamenta estragus ne’e no hateten katak ema ne’ebé halo asaun bele mós sai kliente EDTL nian.
“Ema deskoñesidu horikalan estraga tiha odamatan panel nian. Ita bele deskonfia katak sira selok ho buat ruma, maibé ita seidauk hatene motivu saida mak sira halo ida-ne’e,” Paulo da Silva hateten.
Nia esplika katak odamatan panel nakloke no taka ladi’ak tanba estragus, maibé panel rasik sei funsiona no kontinua fornese eletrisidade ba Dili.
Paulo hateten, estragus la to’o ba parte interna panel, tanba se estragus tama ba laran, bele hamosu problema boot ba fornesimentu eletrisidade.
EDTL hateten, kazu estragus infraestrutura eletrisidade la’ós akontese dala ida de’it. Panel ne’ebé fornese eletrisidade ba área Becora no instala besik Igreja Becora mós hetan estragus iha odamatan.
EDTL seidauk identifika ema responsavel ba estragus ne’e. Hafoin simu informasaun hosi tékniku, instituisaun ne’e pasa kedas informasaun ba Polísia no hahú prosesu identifikasaun liuhosi kamera CCTV besik fatin akontesimentu.
Paulo hateten, odamatan a’at ne’e iha impaktu ba seguransa tanba ema labele kaer panel ne’e, ne’ebé iha alta tensaun. EDTL, hamutuk ho kompañia responsável ba operasaun no manutensaun, sei hadi’a panel no aumenta medida seguransa.
EDTL mós sei instala proteksaun iha área panel sira no kamera CCTV atu reforsa seguransa no prevene estragus iha futuru.
Panel RMU no LV mak parte importante hosi sistema distribuisaun eletrisidade subterráneu. Panel sira-ne’e kontrola no fahe enerjia, regula voltagem no ajuda asegura fornesimentu eletrisidade ba komunidade, instituisaun no empreza sira.
(jos)
