DILI, STLTIMORLESTE.com — Prezidente Repúblika (PR), José Ramos-Horta, inaugura Feira Empregu CNEFP da-3 iha Tibar, hodi destaka importánsia formasaun téknika no kria oportunidade empregu ba joven Timoroan sira.
Iha serimónia inaugurasaun ne’ebé hala’o iha dadeer, kinta-feira, 29 Outubru 2026, Prezidente Ramos-Horta fó apresiasaun ba lideransa CNEFP, ne’ebé prepara joven timoroan sira ho abilidade esensiál atu tama iha merkadu traballu modernu.
Prezidente hateten katak, tinan ida-ne’e, joven timoroan na’in 1.100 resin simu ona formasaun. Nia mós subliña nesesidade atu kontinua investe iha formasaun téknika, manutensaun infraestrutura no literasia dijitál.
Nia salienta katak investimentu ne’e importante atu ajuda joven timoroan sira aproveita oportunidade empregu iha nivel nasionál no internasionál, liuliu iha era dijitál ne’ebé kontinua dezenvolve.
Durante vizita, Prezidente mós apela ba Governu no ministériu sira atu fó prioridade ba produtu lokál, liuhusi atividade sosa no konsume produtu rai-laran.
Nia uza projetu agríkola iha Maubisse no desizaun Prezidénsia atu konsume bee-moos prodús iha Timor-Leste nu’udar ezemplu atu enkoraja apoiu ba produtu nasionál.
Prezidente subliña katak apoiu finanseiru no kompras estadu ba produtu lokál importante atu sustenta indústria ki’ik, kria empregu no absorve joven sira ne’ebé remata ona formasaun.
Nia mós husu lideransa sira atu transforma deklarasaun no kompromisu sira ba asaun konkretu, hodi hametin ekonomia nasionál no aumenta oportunidade servisu ba sidadaun timoroan sira.
(eme)
