DILI, STLTIMORLESTE.com — Reativasaun aviaun ne’ebé pertense ba Autoridade Rejiaun Administrativa Espesiál Oecusse-Ambeno (RAEOA) kontinua sai dezafiu tékniku no administrativu ba autoridade, ne’ebé agora buka modelu operasionál sustentável atu aviaun bele fila fali hala’o servisu tuir rekizitu seguransa no lisensiamentu.
Prezidente Autoridade RAEOA, Regio da Cruz Salu, afirma katak prosesu reativasaun aviaun ZEESM-TL presiza kompleta dokumentasaun, manutensaun mekanika no verifikasaun téknika, molok bele foti desizaun kona-ba operasaun.
Nia hato’o informasaun ne’e ba jornalista sira iha Salaun JL Vila, Fatuhada, Dili, hafoin diskusaun téknika kona-ba estudu viabilidade independente ba aviasaun, ne’ebé hala’o hamutuk ho Alton Group America, Kuarta (28/10/2026).
Ba RAEOA, reativasaun aviaun la’ós de’it kona-ba hadia aviaun ne’ebé kleur ona la opera, maibé mós kona-ba oinsá garante katak operasaun bele hala’o ho lisensa apropriada, kumpre padraun seguransa internasionál no la lori kustu operasionál ne’ebé todan ba instituisaun.
Regio da Cruz Salu esplika katak, maski prosesu administrativu no dokumentasaun aviaun nian avansa ona, aviaun seidauk bele opera diretamente. Aviaun presiza liu husi prosesu manutensaun mekanika, inklui overhaul, no verifikasaun sertifikasaun téknika atu determina se aviaun bele fila fali ba operasaun.
Nia hateten katak, RAEOA mós konsidera possibilidade kooperasaun ho kompanhia aviasaun ne’ebé iha ona lisensa operasionál. Liuhosi modelu ida-ne’e, RAEOA bele kontinua sai na’in ba aviaun, enkuantu operasaun hala’o ho apoiu hosi operadór ne’ebé kumpre rekizitu legál no tékniku.
Estratéjia ne’e buka hamenus gastu operasionál no garante jestaun aviasaun ne’ebé sustentável, enkuantu autoridade kontinua rezolve asuntu administrativu no tékniku ne’ebé seidauk kompletu.
Sertifikasaun Sai Kondisaun Importante
Dezafiu reativasaun aviaun ZEESM-TL mós liga ho nesesidade atu kumpre rekizitu sertifikasaun no lisensiamentu. Tanba ne’e, prosesu ne’e presiza koordenasaun entre entidade relevante atu asegura katak aviaun no aeroportu bele opera tuir padraun seguransa ne’ebé aplika.
Antes ne’e, Ministru Transportes no Komunikasaun, Miguel Marques Manetú, esplika katak reativasaun aviaun ZEESM-TL no operasionalizasaun Aeroportu Internasionál Rota do Sândalo presiza liu husi prosesu tékniku no administrativu.
Nia subliña katak, sertifikasaun ba aviaun no aeroportu la’ós prosesu simples, tanba envolve kumprimentu ba rekizitu tékniku no padraun internasionál. Ministériu Transportes no Komunikasaun kontinua halo esforsu atu kompleta prosesu ne’e.
Ho nune’e, reativasaun aviaun sei depende ba kumprimentu rekizitu sira-ne’e, inklui kondisaun mekanika aviaun nian, dokumentasaun no lisensa operasionál.
(eme)
