BAUCAU, STLTIMORLESTE.com- Iha tinan 2026, Governu Timor-Leste liu husi Ministériu Dezenvimentu Rural Habitasaun Komunitáriu (MDRHK) fó apoiu ba Sentru Dezenvolvimentu Aldeia (CDA) 300 iha territóriu nasionál, ho orsamentu US$ 12.000 ba kada CDA.
Informasaun nee hato’o husi Koordenador Programa Revitalizasaun Komunitáriu, Amaro Ximenes ba jornalista sira hafoin remata abertura formasaun ba CDA Manu Broiler iha Suku Tirilolo, Postu Administrativu Baucau Vila, Munisipiu Baucau, Kinta (27/08/2026).
Nia esplika, apoiu ne’e destina atu tulun komunidade sira dezenvolve atividade ekonomia produtiva tuir potensial no nesesidade iha kada aldeia atu dezenvolve atividade sira hanesan hakiak ikan, manu broiler, manu lokal, karau, fahi, kuda modo no kalpintaria.
Nia subliña, Programa Revitalizasaun Komunitáriu iha objetivu atu transforma potensial komunidade nian sai atividade negósiu ne’ebé bele fó rendimentu no hametin ekonomia família iha área rural.
Apoiu ne’e, nia espera bele aumenta produsaun lokal, kria oportunidade ekonomia ba komunidade no hamenus dependénsia família sira ba fonte rendimentu hosi liur.
Governu liu husi programa ne’e mós buka atu hametin kapasidade CDA sira, nune’e atividade produtiva ne’ebé hala’o iha nivel aldeia bele sai sustentável no fó benefísiu diretamente ba komunidade.
(tom)
