BAUCAU, STLTIMORLESTE.com – Ministériu Ensinu Superior, Siénsia no Kultura (MESCC) liuhusi Diresaun Jerál Ensinu Superior no Siénsia, divulga enkuadramentu legál kona-ba ensinu superiór ba entidades sira iha Munisípiu Baucau.
Diretor Jerál Ensinu Superior husi MESCC, Domingos Barros, hateten katak divulgasaun enkuadramentu legál kona-ba ensinu superiór, inklui Lei Báziku Ensinu Superiór no Dekretu-Lei ne’ebé estabelese Institutu Politékniku Timor-Leste, importante tebes atu entidades sira iha nível munisípal kompriende no bele fahe informasaun kona-ba lei ne’e.
Tanba Lei Báziku Ensinu Superiór ne’e rasik aprova ona iha tinan rua liubá, no audénsia públika mos hala’o ona iha Dili. Maibé, informasaun kona-ba lei ne’e seidauk to’o iha munisípiu hotu, nune’e presiza halo divulgasaun ba entidades sira iha nível munisípal hodi intende.
“Lei ne’e aprova iha tinan rua kotuk, audénsia públika la’o tiha ona iha Dili, maibé seidauk to’o iha munisípiu hotu. Nune’e, ita tenke hatene lala’ok lei ne’e regula ita nia ensinu superiór, atu ita nia joven sira ne’ebé ba eskola iha ensinu superiór bele hatene lei nia konteúdu no orientasaun,” hateten Domingos Barros hafoin remata sesaun abertura atividade divulgasaun iha Sentru Konvensaun Vila Antiga Baucau, Sesta (28/08/2026).
Nia informa katak entidades ne’ebé partisipa iha atividade divulgasaun ne’e inklui Autoridade Munisípal, administrasaun postu, servisu munisípal, estudante ensinu superiór no entidades seluk, ne’ebé Diresaun Jerál Ensinu Superior no Siénsia espera katak liuhusi entidades sira nia partisipasaun ne’e bele tranmite informasaun Lei Báziku Ensinu Superiór to’o iha nível baze, atu estudante sira no komunidade bele kompriende konteúdu no orientasaun ne’ebé estabesele ona iha lei refere.
Domingos Barros mós hateten katak vantajen prinsipál husi Lei Báziku Ensinu Superiór mak atu regula no orienta ema hotu atu hala’o atividade ensinu superiór tuir prosedimentu sira ne’ebé estabelese ona.
Maibé, nia admite katak implementasaun lei ne’e sei hasoru dezafiu, liuliu kona-ba uza lian Portugés no Tetum iha prosesu ensinu no aprendizajen iha nível ensinu superiór.
“Ida ne’e mak dezafiu ba ita nia dosente sira no mós estudante sira, tanba dala ruma presiza tempu. Maibé obrigatóriu tenke, tanba iha Konstituisaun Artigu 13 hateten ona katak rua ne’e mak lian ofisiál, ne’ebé Lei Ensinu Superiór ne’e aliña ba iha ne’ebá. Maibé, ha’u fiar prosesu ne’e pasu por pasú sei hetan rezultadu di’ak iha futuru,” hateten Domingos Barros.
(tom)
