DILI, STLTIMORLESTE.com – Autoridade Suku Afaloicai, Postu Administrativu Uatulari, Munisípiu Viqueque, identifika komunidade uma-kain 16 ne’ebé moris iha kondisaun vulnerável tebes, tanba ne’e husu Prezidente Repúblika (PR), José Ramos Horta no Ministériu Solidariedade Sosiál no Inkluzaun (MSSI) no entidade relevante sira atu tau matan no fó tulun ba família sira ne’e.
Xefe Suku Afaloicai, Cezario Nascimento Pires ba STL, Sesta (28/08/2026) hatete katak, identifikasaun ne’e halo durante atividade vizita no observasaun direta iha aldeia sira, hodi haree kondisaun moris komunidade no família sira ne’ebé presiza atensaun.
Xefe Suku hatete, família sira ne’e hasoru difikuldade oi-oin, inklui hela iha uma la dignu, difikuldade atu hetan hahan no asesu ba estrada.
“Durante ami nia vizita, ami hetan komunidade uma-kain 16 ne’ebé moris vulnerável liu. Inan-aman sira hela iha uma ne’ebé la dignu, hahan mos susar, no atu asesu ba estrada mos difísil. Tanba ne’e, ami nu’udar autoridade lokál husu ba Prezidente Repúblika, Ministériu Solidariedade Sosiál no entidade relevante sira atu bele tulun ami nia populasaun sira ne’e,” dehan Xefe Suku.
Nia hatete, depois halo levantamentu no vizita hotu, autoridade suku sei prepara relatóriu atu hato’o ba Postu Administrativu no Munisípiu, hodi autoridade kompetente sira bele haree no buka solusaun ba problema komunidade nian.
“Dadaun ami hetan ona komunidade vulnerável uma-kain 16. Karik iha futuru ami sei hetan tan, ami sei relata nafatin ba autoridade sira,” dehan nia.
Nu’udar autoridade lokál, Cezario Nascimento Pires hatete katak nia sei kontinua sai matan no tilun ba komunidade iha Suku Afaloicai, hodi hato’o preokupasaun povu ba autoridade Postu Administrativu, Munisípiu no nível nasionál.
Nia mos husu Prezidente Repúblika José Ramos Horta atu, se iha oportunidade, bele vizita diretamente komunidade iha Suku Afaloicai no haree sira nia kondisaun moris.
“Iha biban ida ne’e, hau husu nafatin ba Prezidente Republika atu bele tun haree mos povu ki’ik iha Suku Afaloicai, Munisípiu Viqueque, tanba durante ne’e Prezidente Republika ajuda povu ki’ik no vulnerável sira. Tanba ne’e, ami husu Prezidente atu bele tun haree no tau matan ba sira, nu’udar domin husi aman ba nia oan sira,” dehan Cezario Nascimento Pires.
Nunee mos Xefe Aldeia Lena, Abilio Menezes mos hatete, iha nia aldeia iha komunidade balun ne’ebé moris iha kondisaun vulnerável tebes.
Tanba ne’e, nia husu Prezidente Repúblika atu tau matan ba komunidade sira ne’ebé presiza tulun, liuliu família sira ne’ebé laiha kapasidade atu sustenta sira nia moris.
“Tanba ne’e, ami husu Nai Prezidente Repúblika atu bele tau matan ba komunidade sira iha Aldeia Lena, Suku Afaloicai, Postu Administrativu Uatulari, Munisípiu Viqueque,” dehan Abilio Menezes.
Nia hatete, komunidade balun hela mesak no laiha kbiit atu supera sira nia difikuldade, tanba ne’e presiza atensaun husi Governu no entidade relevante sira.
Enkuantu, Xefe Aldeia Dacu-ate Lamartinho de Carvalho, hatete katak atividade identifikasaun komunidade vulnerável ne’e halo hamutuk ho Xefe Suku no autoridade aldeia sira.
Sira lao haleu aldeia ida-idak hodi identifika diretamente família sira ne’ebé moris iha kondisaun vulnerável no presiza tulun.
“Ami hamutuk ho Xefe Suku lao haleu iha Suku laran hodi identifika komunidade sira. Iha hau nia aldeia rasik, komunidade barak moris susar no vulnerável tebes,” dehan Lamartinho de Carvalho.
Nia fó ezemplu kona-ba Duarte Canizio no nia feen, Alcina Menezes, ne’ebé tuir nia hasoru difikuldade tanba kondisaun saúde no sira nia fatin hela-moris.
“Duarte Canizio durante ne’e moras fase ran, no nia feen Alcina Menezes mos ho kondisaun moras. Sira labele hetan buat ida, no hela dook husi kapitál, estrada mos aat. Tanba ne’e, ami husu ba Ministériu relevante atu tau matan ba ami nia komunidade sira,” dehan Xefe Aldeia Daco Ate.
Nunee mos Konsellu Suku Afaloicai, Paul Soares, hatete katak relatóriu kona-ba rezultadu vizita no levantamentu sei hato’o depois atividade hotu remata.
Nia hatete, vizita ne’e lidera husi Xefe Suku no envolve membru Konsellu Suku, Xefe Aldeia no autoridade lokál sira, ho objetivu atu identifika família sira ne’ebé moris iha kondisaun vulnerável.
“Ami identifika ona uma-kain 16 ne’ebé moris vulnerável no presiza tebes tulun. Levantamentu ne’e sei hahú husi aldeia tolu, enkuantu aldeia seluk seidauk,” dehan Paul Soares.
Tanba ne’e, autoridade Suku Afaloicai kontinua husu Prezidente Repúblika José Ramos-Horta no Ministériu Solidariedade Sosiál no Inkluzaun atu tau atensaun ba família vulnerável sira, hodi bele fó tulun no hakmaan sira nia moris loroloron.
Uma-kain vulnerável sira ne’ebé identifika inklui família faluk ne’ebé hela iha uma la dignu, ema katuas no ferik ne’ebé hela iha uma aat, ema ne’ebé hasoru problema saúde, no família sira seluk ne’ebé moris iha kondisaun vulnerabilidade.
Suku Afaloicai Suku Afaloicai, Postu Administrativu Uatulari, Munisípiu Viqueque, iha populasaun total 2.947 habitantes, tuir sensus 2022.
Suku ne’e kompostu husi aldeia 10, mak Buibela, Cailaque, Caitau, Dacu Ate, Lari, Lena, Loro Sa’e, Ossocaiua, Uaicai no Uato Ita.
(eme)
