DILI, STLTIMORLESTE.com — Tempu to’o ona atu halo promosaun ba Juiz sira husi segunda klase ba primeira klase, tanba iha Juiz barak ne’ebé servisu kleur ona iha Tribunal Primeira Instánsia.
Sergio Dias Quintas hateten katak Juiz sira ne’ebé servisu kleur no iha esperiénsia, liuliu sira ne’ebé kompleta ona formasaun, presiza hetan oportunidade atu avansa iha sira nia karreira.
“Tempu to’o ona atu promove Juiz sira. Sira barak servisu tinan naruk iha Tribunal Primeira Instánsia no nunka promovidu,” dehan Sergio Dias Quintas ba STL iha Kaikoli, Sesta (28/08/2026).
Nia hateten katak, agora daudaun númeru Juiz primeira klase seidauk barak, enkuantu Juiz segunda klase barak liu. Tanba ne’e, promosaun Juiz sira bele ajuda aumenta kapasidade no apoiu servisu Tribunal nian.
Tuir Sergio, antes ne’e promosaun la’o ho limitasaun tanba númeru rekursu umanu menus, falta kondisaun no vontade polítika.
Nia mos konsidera katak, se Timor-Leste estabelese STJ, presiza halo alterasaun ba Kódigu Prosesu Sivil, liuliu atu simplifika prosesu sivil ne’ebé atualmente bele lori tempu naruk. Nia propoin atu kazu sivil ho valor ki’ik bele trata ho prosesu ne’ebé simples, atu evita akumulasaun prosesu pendente.
Iha sorin seluk, akademiku UNTL Sebastião Dos Santos hateten katak Juiz Timor-oan barak iha kapasidade diak no merese atu hetan promosaun tuir sira nia kompeténsia.
“Importante tebes Juiz sira ne’ebé ho kapasidade diak bele halo promosaun ba sira nia karreira, hodi apoiu servisu iha Tribunal nian,” dehan Sebastião.
Nia subliña katak Juiz Timor-oan sira iha ona kapasidade atu halao sira nia knar, importante mak tenke halao tuir lei hodi lori sistema justisa lao ba oin.
Prezidente Tribunal Rekursu, Afonso Carmona, hateten katak prosesu promosaun Juiz sira sei lao hela. Tuir nia, promosaun sei konsidera depois inspetor kompleta avaliasaun ba Juiz sira no submete relatoriu kona-ba rezultadu avaliasaun.
(ter)
