DILI, STLTIMORLESTE.com – 28 Agostu 2026, Prezidente Repúblika (PR), José Ramos Horta simu karta husi Primeiru (PM), Ministru Reinu Unidu, Rt Hon. Andy Burnham, nu’udar resposta ba mensajen felisitasaun ne’ebé Prezidente haruka ba Burnham kona-ba nia nomeasaun ba kargu Primeiru Ministru Reinu Unidu.
Korespondénsia entre líder rua ne’e reafirma amizade kleur no kompromisu komún entre Timor-Leste no Reinu Unidu atu hametin valór demokrátiku, pás, direitus umanus, estadu direitu no kooperasaun internasionál.
Iha karta ne’ebé data 18 Agostu 2026, Andy Burnham hato’o nia agradesimentu ba Prezidente Ramos-Horta no hateten katak nia hein atu serbisu hamutuk ho Timor-Leste hodi hametin amizade entre nasaun rua.
Burnham mós subliña katak Timor-Leste no Reinu Unidu partilla kompromisu komún ba demokrasia, pás, direitus umanus no estadu direitu. Nia konsidera mós lideransa Ramos-Horta kona-ba valór sira-ne’e nu’udar inspirasaun.
“Ita-nia nasaun rua partilla kompromisu ida ba demokrasia, pás, direitus umanus no estadu direitu, no Ita-nia lideransa pesoál kona-ba asuntu sira-ne’e kontinua sai inspirasaun ba ami,” hakerek Burnham iha ninia karta.
Primeiru Ministru Reinu Unidu mós hateten katak iha situasaun instabilidade globál ne’ebé aumenta, nasaun sira ne’ebé kompromete ba valór sira-ne’e presiza serbisu hamutuk atu buka solusaun koletiva ba dezafiu komún.
Burnham mós hatudu vontade atu aprofunda kooperasaun ho Timor-Leste, inklui iha preparasaun Timor-Leste atu asume Prezidénsia ASEAN iha tinan 2029.
Nia mós apresia Timor-Leste nia lian forte iha negosiasaun klimátika internasionál no pozisaun prinsipál Timor-Leste iha fórum Organizasaun Nasaun Unidas (ONU), inklui kona-ba kestaun autodeterminasaun.
Aleinde ne’e, Burnham rekoñese oportunidade atu hametin kooperasaun bilaterál iha área sira hanesan seguransa saúde, no mós valoriza kontribuisaun komunidade Timor-oan ne’ebé hela iha Reinu Unidu nu’udar ponte importante entre sosiedade rua.
Antes ne’e, iha karta ne’ebé data 21 Julhu 2026, Prezidente Ramos Horta hato’o nia felisitasaun sinseru ba Burnham kona-ba nia nomeasaun ba kargu Primeiru-Ministru Reinu Unidu.
Ramos Horta hato’o mos nia dezeju ba Burnham atu lidera Reinu Unidu ba futuru ida ho prosperidade, estabilidade no progresu, enkuantu promove valór demokrátiku, justisa sosiál no dezenvolvimentu sustentável.
Prezidente mós reafirma nia kompromisu atu kontinua hametin relasaun amizade no kooperasaun entre Timor-Leste no Reinu Unidu, inklui liuhusi dezenvolvimentu liután ba ligasaun ho komunidade Timor-oan iha Reinu Unidu.
Tuir Prezidente Ramos Horta, komunidade Timor-oan iha Reinu Unidu iha papel importante nu’udar ponte ba amizade no kompriensaun entre povu Timor-Leste no povu Britániku.
Troka karta entre líder rua ne’e hatudu vontade atu kontinua dezenvolve relasaun bilaterál, hametin diplomasia multilaterál no reforsa amizade entre Timor-Leste no Reinu Unidu.
(eme)
