DILI, STLTIMORLESTE.com – Tribunál Judisiál Primeira Instánsia Dili (TJPID) iha Sabadu, hala’o primeiru interogatoriu ba arguidu na’in 13 ne’ebé autoridade seguransa detein tanba suspeita envolve iha atividade Scam Call Centre iha Aldeia Carungulau, Suku Metiaut, Postu Administrativu Cristo Rei, Munisípiu Dili.
Arguidu sira lori ba tribunal husi Ministériu Públiku (MP), ne’ebé reprezenta husi Prokuradór João Marques. MP promove akuzasaun ba arguidu sira ho krime jogu ilísitu, asosiasaun kriminoza, brankamentu kapitál no burla informátika, tuir Artigu 322, 188, 313 no 268 husi Kódigu Penal Timor Leste.
Iha prosesu primeiru interogatoriu, Juíza Turnu Ersília de Jesus rona deklarasaun husi arguidu na’in 13, antes tama ba faze alegasaun husi Ministériu Públiku no parte defeza.
Iha alegasaun, Prokuradór João Marques husu tribunal atu aplika medida koasaun prizaun preventiva ba arguidu na’in 13, ho razaun atu asegura prosesu investigasaun ne’ebé sei lao hela.
Enkuantu, parte defeza husu tribunal atu la aplika prizaun preventiva, maibé aplika medida sira hanesan kausaun, proibisaun atu sai husi territóriu, aprezentasaun periódika no mantein Termu Identidade no Rezidénsia (TIR) ne’ebé antes ne’e aplika ba arguidu sira.
Hafoin rona alegasaun husi parte hotu, Juíza Turnu Ersília de Jesus adia despaisu ba loron Domingu, 30 Agostu, tuku 14:00, hodi rona desizaun kona-ba medida koasaun ba arguidu na’in 13.
Rekorda katak, iha 26 Agostu 2026, ekipa konjunta husi Diresaun Servisu Investigasaun Kriminál (DSIK) no Direksaun Servisu Intelijénsia Polísia (DSIP), PNTL, hamutuk ho Servisu Migrasaun Timor-Leste, hala’o operasaun iha Aldeia Carungulau, Suku Metiaut.
Operasaun ne’e hahú iha tuku 08:00 dadeer no konsege detein sidadaun estranjeiru balu, inklui feto ida, ne’ebé suspeitu envolve iha atividade Scam Call Center.
Autoridade sira mós asegura evidénsia, inklui telemóvel kuaze 30 resin ne’ebé uza SIM Card Telemor.no kareta ida. Tuir informasaun autoridade, telemóvel sira ne’e utiliza atu asesu ba servisu internet Starlink.
Prosesu investigasaun kona-ba kazu ne’e sei kontinua, no tribunal sei determina medida koasaun ba arguidu na’in 13 iha despaisu ne’ebé sei rona Domingu.
(ter)
