DILI, STLTIMORLESTE.com – Loron 30 Agostu, ne’ebé konhesidu nu’udar Loron Konsulta Popular, konsidera hanesan loron istóriku no importante ba povu Timor Leste (TL), tanba iha loron ida-ne’e povu vota hodi hili ukun rasik-an, ne’ebé sai dalan ba TL atu hetan independénsia no sai nasaun soberania.
Jurista Sergio Dias Quintas dehan, loron Konsulta Popular importante tebes tanba marka finál okupasaun Indonézia iha Timor-Leste no konkretiza mehi povu Timor-Leste atu ukun rasik-an.
“Loron 30 Agostu importante tebes ba povu Timor-Leste, tanba husi loron Konsulta Popular maka okupasaun Indonézia iha Timor-Leste termina, hodi Timor-Leste konkretiza nia mehi sai nasaun soberana iha mundu,” dehan Sergio Dias Quintas ba STL iha Kaikoli, Domingu (30/08/2026).
Nia hatutan katak, Konsulta Popular iha tinan liubá nakonu ho esperansa ba povu Timor-Leste, tanba rezultadu votasaun lori povu ba ukun rasik-an. Maibé, prosesu ne’e mos akompaña ho sofrimentu, terus no lakon moris ema barak.
Nu’udar sidadaun, sublina lamenta tanba Estadu Timor-Leste ladún fó importánsia ne’ebé sufisiente ba Loron Konsulta Popular, kompara ho komemorasaun loron boot sira seluk ne’ebé Estadu aloka osan barak.
Nia dehan, loron ida-ne’e merese atu hetan atensaun liután tanba iha tinan 1999 povu Timor-Leste hamriik hamutuk no vota hodi deside sira-nia futuru.
Nia mos husu ba lideransa Estadu atu fó omenajen no marka prezensa iha komemorasaun Loron Konsulta Popular kada tinan, tanba loron ida-ne’e iha valór istóriku boot ba nasaun.
Enkuantu ne’e, akadémiku Universidade Nasionál Timor Lorosa’e (UNTL), Rafael De Jesus, subliña katak Loron Konsulta Popular presiza kontinua komemora kada tinan.
“Loron ida-ne’e importante duni atu selebra, tanba loron ida-ne’e maka povu Timor vota hodi deside ukun rasik-an,” dehan Rafael De Jesus.
Nia hatutan katak komemorasaun kada tinan importante hodi povu Timor-Leste hanoin no valoriza fila-fali loron istóriku ne’ebé marka desizaun povu ba ukun rasik-an.
(ter)
