DILI, STLTIMORLESTE.com — Tribunal Judisiál Primeira Instánsia Dili (TJPID) liuhusi despaisu iha prosesu primeiru interogatoriu ne’ebé hala’o iha Domingu (30/08), deside aplika medida koasaun prizaun preventiva ba arguidu estranjeiru na’in 13, ne’ebé suspeitu envolve iha atividade Scam Call Centre iha Suku Metiaut, Dili.
Desizaun ne’e foti husi Juíza turnu, Ersília de Jesus, depois Tribunal konsidera iha indísiu kona-ba alegasaun krime ne’ebé Ministériu Públiku (MP) hatama ba Tribunal.
Arguidu na’in 13 ne’e detein husi autoridade seguransa iha Aldeia Carungulau, Suku Metiaut, Postu Administrativu Cristo Rei, Munisípiu Dili.
MP ne’ebé reprezenta husi Prokuradór João Marques, akuzasaun ba arguidu sira ho krime jogu ilícitu, asosiasaun kriminoza, brankamentu kapitál no burla informátika, tuir Artigu 322, 188, 313 no 268 husi Kódigu Penal Timor-Leste.
Iha alegasaun, Prokuradór João Marques husu Tribunal atu aplika medida koasaun prizaun preventiva ba arguidu na’in 13, ho konsiderasaun katak medida ne’e presiza atu asegura prosesu investigasaun ne’ebé sei lao hela.
Enkuantu, parte defeza husu Tribunal atu la aplika prizaun preventiva. Defeza propoin medida koasaun alternativu, inklui kausaun, proibisaun atu sai husi territóriu, aprezentasaun periódika no manutensaun Termu Identidade no Rezidénsia (TIR) ne’ebé antes ne’e aplika ba arguidu sira.
Kazu ne’e hahú hosi operasaun konjunta iha 26 Agostu 2026, ne’ebé hala’o husi ekipa Direksaun Servisu Investigasaun Kriminál (DSIK) no Direksaun Servisu Intelijénsia Polísia (DSIP), PNTL, hamutuk ho Servisu Migrasaun Timor-Leste.
Operasaun ne’e hala’o iha Aldeia Carungulau, Suku Metiaut, hahú iha tuku 08:00 dader. Iha operasaun ne’e, autoridade konsege detein sidadaun estranjeiru balu, inklui feto ida, ne’ebé suspeitu envolve iha atividade Scam Call Centre.
Autoridade sira mós konfiska no asegura evidénsia, inklui telemóvel kuaze 30 resin ne’ebé uza SIM Card Telemor no kareta ida. Tuir informasaun hosi autoridade, telemóvel sira ne’e suspeitu uza atu asesu ba servisu internet Starlink.
Prosesu investigasaun kona-ba kazu ne’e sei kontinua. Tribunal sei halo determinasaun tuir prosesu legal ba arguidu sira, enkuantu autoridade kompetente kontinua hala’o investigasaun kona-ba atividade Scam Call Centre ne’e.
(ter)
