BAUCAU, STLTIMORLESTE.com – Sala Intensive Care Unit (ICU) iha Hospital Rejionál Eduardo Ximenes (HoREX) Baucau rejista pasiente kritiku hamutuk na’in 33 no neen (6) tenke transfere ba Hospital Nasionál Guido Valadares (HNGV) Dili, tanba falta CT Scan no ekipamentu médiku balu.
Xefe Departamentu Emerjénsia Ambulatóriu iha Sala ICU HoREX Baucau, Médiku Jerál Bazilia dos Santos Freitas, hatete katak sala ICU HoREX Baucau hahú funsiona iha Abríl 2026. Maibé, durante fulan rua primeiru, laiha pasiente ne’ebé presiza tratamentu iha ICU, tanba laiha kazu ho kondisaun kritiku.
“Husi fulan Junhu to’o agora totál pasiente 33. Husi emerjénsia mai ICU tanba kondisaun ne’ebé kritiku ou grave. Entaun ami konsulta ho doutor espesialista internista sira, diretamente transfere mai iha ICU,” hatete Bazilia ba jornalista sira iha Sala ICU HoREX Baucau, Segunda (31/08/2026).
Tuir Bazilia, pasiente na’in 33 ne’ebé simu tratamentu iha ICU maioria transfere husi Sala Emerjénsia HoREX Baucau tanba sofre moras stroke, asidente no kondisaun médika grave seluk ne’ebé presiza monitorizasaun no tratamentu intensivu.
Nia akresenta, husi totál pasiente na’in 33 ne’ebé rejista, pasiente na’in neen tenke transfere ba ICU iha HNGV Dili hodi kontinua hala’o tratamentu no ezame sitisken, tanba HoREX Baucau atualmente seidauk iha sitisken no falta aimoruk ka ekipamentu médiku adekuadu balu iha HoREX.
Problema ne’e, Diresaun HoREX hato’o ona nesesidade ekipamentu médiku adisionál ba Ministériu Saúde, inklui sitisken, atu bele aumenta kapasidade atendimentu ba pasiente kritiku iha Munisípiu Baucau no minimiza transfere pasiente ba HNGV Dili.
“Husi direksaun ami hato’o ona, maibé desizaun ne’e iha Ministériu Saúde mak bele foti bainhira HoREX bele iha sitisken. Bainhira HoREX iha ona sitisken, presiza mós rekursu médiku no espesialista,” dehan Bazilia.
Enkuantu ne’e, Florindo Correia, família ida husi pasiente ne’ebé atualmente hetan tratamentu iha ICU HoREX Baucau, agradese ba Ministériu Saúde tanba estabelese ona ICU iha HoREX, ne’ebé konsidera fasilita família sira husi Baucau, Viqueque no Lautém atu vizita no akompaña pasiente.
Maibé, Florindo lamenta tanba fasilidade ba família pasiente sira ne’ebé hein durante oras naruk seidauk adekuadu, liuliu laiha kadeira ka fatin apropriadu iha li’ur atu tuur no deskansa.
“Ha’u sente ida ne’e ladún di’ak, tanba menus fasilidade ba saúde nian. Ha’u husu ba parte relevante sira oinsá atu halo preparasaun ba fatin ruma ba ema hein moras sira,” hatete Florindo.
Florindo konsidera katak fasilidade ba tratamentu iha ICU di’ak ona, maibé fasilidade ba família pasiente sira seidauk adekuadu. Tanba ne’e, nia husu ba Ministériu Saúde no parte kompetente sira atu fó apoiu kadeira no fatin apropriadu ba família ne’ebé hein pasiente.
Entertantu,leito ba pasiente iha sala ICU HoREX Baucau hamutuk haat no mediku na’in haat inklui emfremeiru no emfremeira hamutuk na’in 10.
(tom)
