BAUCAU, STLTIMORLESTE.com – Konstrusaun Ponte iha Mota Samalari, Postu Administrativu Baguia, Munisípiu Baucau atrazadu, tanba impaktu husi kondisaun klima, udan no difikuldade iha mobilizasaun material ba área projetu.
Administrador Postu Administrativu Baguia, Mario Xavier da Silva, hatete katak tuir observasaun autoridade lokal, servisu konstrusaun ponte ne’e lao tarde kompara ho tempu ne’ebé determina iha kontratu.
“Konstrusaun Ponte iha Mota Samalari ami nia observasaun lao tarde, tanba impaktu husi klima nee rasik. Dala ruma udan no dalan sira ne’e fó impaktu ba mobilizasaun material. Nee mak ita dehan nia kontratu besik remata ona, maibé projetu seidauk hotu tanba impaktu husi buat sira ne’e,” dehan Mario Xavier ba STL liuhusi telefone, Segunda (31/08/2026).
Maski hasoru obstákulu sira ne’e, Administrador Postu Administrativu Baguia afirma katak progresu konstrusaun nafatin la’o no trabalhador hamutuk ho tekniku sira kontinua hala’o servisu iha área projetu.
Nia esplika katak kondisaun klima, liuliu udan, bele hamosu difikuldade ba movimentasaun no transporta material konstrusaun ba área ponte, tanba kondisaun dalan ne’ebé afetadu bele aumenta tempu hodi finaliza lalais projetu refere.
Mario Xavier mós hatete, autoridade lokal kontinua tau matan ba implementasaun projetu ne’e, liuliu iha aspetu estabilidade no seguransa durante konstrusaun la’o iha terrenu.
“Durante projetu ne’e la’o hola parte ba iha estabilidade. Nu’udar Autoridade hamutuk ho parte seguransa tau matan ba ida ne’e,” nia afirma.
Konstrusaun Ponte Mota Samalari konsidera importante ba mobilidade komunidade iha área Baguia, tanba ponte refere iha papel importante atu fasilita movimentasaun ema no transporte sasán, liuliu bainhira komunidade hasoru kondisaun klima ne’ebé bele afeta asesibilidade dalan.
Maski kontratu projetu ne’e besik remata, autoridade lokal sei kontinua monitoriza progresu servisu no kondisaun iha área, ho espetativa konstrusaun bele kompleta tuir padraun no objetivu projetu.
Entretantu, projetu konstrusaun ponte iha mota Samalari responsabiliza husi Kompania MCC20 Grup Corp, Ltd, ho númeru konkursu /009/MOP-2024, ne’ebé sei konstrui ho durasaun fulan-12 ho valor orsamentu hamutuk US$ 4.025.624.71 ho medida ponte distansia naruk metru 108 no luan metru 7, ne’ebé hetan supervizaun husi Ministériu Obras Públikas.
(tom)
