DILI, STLTIMORLESTE.com – Prezidente Repúblika (PR), José Ramos Horta no Ministra Estadu ba Ministériu Negósiu Estranjeiru Emirados Árabes Unidos (EUA), Noura Al Kaabi, diskute konstrusaun dormitóriu ba feto joven Timoroan ne’ebé hetan apoiu husi Governu Emirados Árabes Unidos. Projetu ne’e sei fasilita fatin hela ba estudante feto 300 no planeadu atu remata iha tinan 2027.
Enkontru ne’e hala’o iha Palásiu Prezidensiál Nicolau Lobato Dili, Segunda (31/08/2026), no hafoin enkontru, Prezidente Ramos Horta ho Ministra Noura Al Kaabi vizita fatin konstrusaun dormitóriu ne’ebé lokaliza iha área kotuk Palásiu Prezidensiál Nicolau Lobato, Bairru Pite. Iha oportunidade ne’e, sira mós kuda ai-oan hamutuk iha fatin projetu.
Prezidente Ramos Horta hatete katak ideia kona-ba konstrusaun dormitóriu ne’e hahú durante nia vizita ba Abu Dhabi iha 2023. Iha tempu ne’ebá, Prezidente esplika ba Prezidente Emirados Árabes Unidos kona-ba kondisaun moris feto jovem Timoroan sira no nesesidade atu sira hetan fatin hela ne’ebé seguru no diak.
“Hau uluk kedas iha mehi oinsá bele ajuda feto sira, oinsá bele hela diak, oinsá ho seguransa. Liurai hau kaer hau nia liman, nia hatete nia sensibilidade ba ida-ne’e. Entaun hatete hau sei halo karta ofisiál ida. Nia hatete lalika halo karta ofisiál, desizaun halo ona. Entaun bolu embaixadór no ministru sira, hau hakarak projetu ne’e lao ba oin. Primeiru hahú iha fatin seluk iha Balide, komfusaun oin-oin, depois haree terenu Prezidénsia nia mamuk hela, halo iha ne’e. Primeiru-Ministru mós konkorda,” hatete Prezidente Ramos Horta.
Prezidente Ramos Horta mós konsidera abertura Embaixada Emirados Árabes Unidos iha Timor-Leste nu’udar akontesimentu istóriku no importante ba relasaun entre nasaun rua, tanba Emirados Árabes Unidos sai nasaun Árabe dahuluk ne’ebé loke embaixada iha Timor Leste.
Edifísiu dormitóriu ne’e sei harii iha área ne’ebé nia oin ba estrada foun no besik Embaixada Emirados Árabes Unidos. Fasilidade ne’e sei bele simu estudante feto to’o 300, ho ekipamentu inklui klinika médika, biblioteka, sistema akaptasaun bee-udan no fasilidade seluk.
Kona-ba empregu, Prezidente hatete katak traballadór sira ne’ebé sei hala’o servisu konstrusaun dormitóriu ne’e sei maioria boot mai husi Timor-Leste, kuaze 100 porsentu.
Ministra Noura Al Kaabi hatete katak projetu ne’e mós sei fó oportunidade ba estudante Timoroan sira iha área téknika, enjenharia no konstrusaun atu halo estájiu no aprende diretamente liuhusi servisu prátiku iha projetu ne’e.
“Iha fatin ida-ne’e ami prontu mós simu estudante Timorense ne’ebé estuda iha área konstrusaun bele mai halo estájiu, atu servisu hamutuk ho kompanhia, nune’e bele hasa’e sira nia kapasidade no hola parte iha sira nia kursu,” hatete Ministra Noura Al Kaabi.
Oportunidade estájiu ne’e sei permite estudante sira hetan esperiénsia prátika no hasa’e kapasidade profisionál, liuliu iha área enjenharia no konstrusaun.
Konstrusaun dormitóriu ba feto jovem ne’e planeadu atu remata iha períodu entre Maiu no Agostu 2027.
(eme)
