DILI, STLTIMORLESTE.com – Atualmente, Inspetor Eskolar iha Munisípiu Liquiçá hamutuk nain 10, ne’ebé responsavel atu halo kontrolu ba eskola sira ne’ebé lokaliza iha munisípiu refere.
Diretor Servisu Edukasaun Munisípiu Liquiçá, Julio da Silva, hato’o informasaun ne’e liu husi telefone, Segunda (31/08/2026).
“Ita-nia inspetor eskolar iha Munisípiu Liquiçá agora dadaun nain 10. Sira kobre hotu eskola sira. Ema ida bele kobre agrupamentu ida ka rua, maibé liu-liu ba ensinu sekundáriu, tenke iha inspektor atu bele haree liu ba área espesífika sira. Nain 10 nee ba pré-eskolár nain 3, sekundáriu nain 1 no ensinu báziku nain 6,” nia dehan.
Julio da Silva hatete katak, ho númeru inspetor nain 10 agora daudaun sira bele halo kontrolu ba eskola sira iha Liquiça. Maibé, atu servisu kontrolu bele lao diak liután, iha futuru presiza aumenta tan inspektor nain ida ka rua, atu bele kobre eskola hotu.
Iha parte seluk, Diretor Servisu Edukasaun Munisípiu Ainaro, Patricio da Costa Magno, hatete katak eskola sira iha área remota ho distánsia ne’ebé dook malu, nune’e inspetor ne’ebé iha agora seidauk konsege kobre eskola hotu.
“Ita-nia eskola iha área remota sira ho distánsia ne’ebé dook malu. Entaun, inspektor ne’ebé mak iha, sira labele kobre hotu eskola sira, tanba eskola sira dook malu. Tanba ne’e, ba oin presiza aumenta tan inspektor,” nia komenta.
Iha fatin seluk, Superintendente Edukasaun Munisípiu Dili, Cesarina Correia Guterres, hatete katak Munisípiu Dili iha inspetor no inspetora hamutuk ema nain 12, ne’ebé konsidera sufisiente atu halo kontrolu ba eskola sira iha munisípiu refere.
“Ami-nia inspetor no inspektora iha Servisu Edukasaun Munisípiu Dili total hamutuk 12 pessoas, no koloka ba eskola sira hamutuk 232 eskola. Husi total eskola iha leten, mai husi eskola ESTV 10, ESG 36, EBC 46, EBF 80 no EPE 60 eskola. Kada inspetor no inspektora máximu kontrola eskola 21. Tanba ne’e, ami-nia inspektor sanolu resin nee sufisiente ona atu bele kobre ami-nia eskola sira iha Munisípiu Dili,” dehan nia.
(jac)
