DILI, STLTIMORLESTE.com – Tribunál Judisiál Primera Instánsia Dili (TJPID) kondena arguidu na’in neen (6) ho pena prizaun fulan 6, suspende tinan 1, tanba komete krime pekulatu de uzu.
Tribunal Judisiál Primeira Instánsia Dili, Segunda nee (31/08) liuhusi prosesu sumáriu, kondena arguidu na’in 6 ho inisiál MP, AdS, AMT, NdSM, RPM no RG tanba komete krime Pekulatu de Uzu.
Juiz José Escurial deside aplika pena prizaun fulan 6 ba kada arguidu, maibé suspende ezekusaun pena durante tinan 1.
Tribunal konsidera katak aktu arguidu sira prenxe elementu krime Pekulatu de Uzu, tanba sira uza veíkulu Estadu la tuir finalidade ne’ebé determina.
Hafoin desizaun, Juiz José Escurial informa arguidu sira katak, se la konkorda ho desizaun Tribunal, sira bele rekore ba Tribunal Rekursu (TR) iha prazu loron 30.
Tribunal mos hatete katak durante períodu suspensaun tinan 1, arguidu sira tenke la komete krime foun. Se komete krime foun, suspensaun pena bele hetan revogasaun tuir lei.
Iha alegasaun, Ministériu Públiku reprezenta hosi Prokuradór João Marques, deklara katak arguidu sira konfesa ba faktu sira no prova dokumentál iha autos hetan konfirmasaun hosi arguidu sira.
MP konsidera faktu sira provadu no husu Tribunal atu deklara akuzasaun provadu no aplika pena apropriada tuir medida pena ne’ebé lei determina.
Enkuantu, defeza reprezenta hosi Manuel Amaral, deklara katak arguidu sira konfesa ba faktu sira no admite katak veíkulu ne’ebé uza pertense ba Estadu, maibé uza la tuir finalidade determina.
Advogada Elisabeth Lopez ne’ebé reprezenta arguidu RPM, deklara katak nia klienti konfesa ba faktu sira, kolabora ho ekipa konjunta no primeira vez hasoru prosesu iha Tribunal.
Tanba konsiderasaun hirak-ne’e, defeza husu Tribunal atu troka pena prizaun ho pena multa.
Prosesu sumáriu ne’e prezide hosi Juiz José Escurial. Ministériu Públiku reprezenta hosi Prokuradór João Marques, enkuantu arguidu na’in neen hetan asisténsia hosi Defensór Públiku no advogadu privadu.
Arguidu sira detein hosi ekipa konjunta kompostu hosi Komisaun Anti-Korrupsaun (KAK), Patrimóniu Estadu, Direksaun Nasionál Transporte Terrestre (DNTT), Komisaun Funsaun Públika (KFP), Inspesaun Jerál Estadu (IGE) no Polísia Tránzitu, tanba uza veíkulu Estadu la tuir regra.
(ter)
